Зөвхөн Москва хотод гэхэд 1201 хүн, хөрш зэргэлдээх Санкт-Петербург хотноо 471 хүнийг тус тус саатуулсан байна. Эсэргүүцлийн давлагаа газар авч, Оросын 122 хотод өрнөсөн нь дээд амжилт болжээ. Мөн хилийн чанад дахь 78 хотод жагсаал зохион байгуулсан тухай мэдээ байна. Жагсаалын үеэр гурван мянга гаруй хүнийг саатуулсны дунд А.Навальныйн эхнэр Юлия Навальная болон түүний туслах Любовь Соболь нар байгаа аж.

Эсэргүүцлийн жагсаалд ихэвчлэн Оросын залуу үеийн төлөөллүүд оролцсон агаад тэд дарангуйлагч эрх баригчдыг огцрохыг шаардан ардчилал, эрх чөлөөнийхөө төлөө үзэл бодлоо тайван замаар илэрхийлсэн байна. Гэвч жагсагчид болон цагдаа нарын хооронд үүссэн мөргөлдөөний үеэр эмх замбараагүй байдал үүсчээ. Ажиглагчдын онцолсноор “Энэ нь Орос орны шинэ үеийн түүхэнд эсэргүүцлийн ажиллагаа явуулсан хугацаан дахь хамгийн өндөр тоо” гэв. Хамгийн сүүлд тус улсад 2017 онд болсон жагсаалын үеэр 1769 хүнийг саатуулж байв.

ОХУ-ын эрх баригчид урьд нь ард иргэддээ хандан цар тахлын хөл хорионы дэглэмийг зөрчихгүй байх. Бямба гаригт болох хууль бус жагсаалд оролцохгүй байхыг удаа дараа анхааруулсан гэнэ.

Оросын хүчний байгууллагынхны уг үйлдлүүдэд өрнөдийн орнууд болон хүний эрхийн олон улсын байгууллагууд шүүмжлэлтэй хандаад байна. Саатуулагдагсдын дунд мөн 300 гаруй хүүхэд, 40 орчим сэтгүүлч байгаа аж.

ВВС агентлагийн онцолсноор“ОХУ-д өрнөсөн эсэргүүцлийн жагсаалд оролцогчдын тоог нарийн гаргахад хэцүү. Гэхдээ энэ нь сүүлийн жилүүдэд тус улсад болсон хамгийн том зөвшөөрөлгүй жагсаал боллоо. Жагсагчид сөрөг хүчний тэргүүн А.Навальныйг суллахыг шаардаж, ОХУ-д ардчилал, үзэл бодлоо илэрхийлэх эрх чөлөөг шаардан, ерөнхийлөгч В.Путин, түүний тойрон хүрээлэгчдийг огцрохыг шаардсан”гэжээ. Мөн өрнөдийн зарим хэвлэлүүдэд ОХУ-д болж буй үйл явцыг “Сүүлийн 10 жилийн хугацаанд болсон хамгийн томоохон хэмжээний эсэргүүцлийн жагсаал” гэж тодотгосон байна.

АНУ-ын Төрийн департамент ОХУ дахь үйл явц, иргэдийг олноор нь саатуулсан явдлыг “Ард түмний үзэл бодлоо тайван замаар чөлөөтэй илэрхийлэх эрхийг зөрчсөн үйлдэл” хэмээн тодорхойлсон байна. Тус байгууллагын хэвлэлийн төлөөлөгч Нэд Прайс “Жагсаалд оролцож буй иргэд болон сэтгүүлчдийн эсрэг хүчирхийлэл үйлдэж байгаа нь хүний эрх, хэвлэлийн эрх чөлөө, сөрөг хүчний үзэл бодлоо илэрхийлэх эрхийг ноцтой зөрчсөн үйлдэл юм. А.Навальныйг даруй суллахыг шаардаж байна” гэв.

Навальныйн хэрэг

А.Навальный нь өнгөрсөн наймдугаар сарын 20-ны өдөр ОХУ-ын Томск хотоос Москваг чиглэн хөөрсөн онгоцонд сууж явахдаа бие нь огцом муудсанаас ослын буулт хийсэн билээ.

Хожим түүнийг хордуулсан болохыг тогтоосон юм. Комд орсон түүнийг тусгай онгоцоор ХБНГУ руу аваачин эмчилгээнд хамруулсан билээ. Германы тал өнгөрсөн есдүгээр сард түүнийг "Новичок" бүлэгт хамаарах бодисоор хордуулсан гэж мэдэгдсэн юм.

Оросын сөрөг хүчний тэргүүн Берлин хотын эмнэлэгт таван сар эмчлүүлсний дараа нутаг буцахаа мэдэгдсэн. Түүнийг өнгөрсөн долоо хоногт Шереметьево нисэх онгоцны буудалд газардах үед нь хүчний байгууллагынхан саатуулсан юм. А.Навальныйг нутаг буцахын өмнө ОХУ-ын Шийтгэл гүйцэтгэх холбооны албанаас түүнд 2014 онд оноосон тэнсэн харгалзах ялын нөхцөлийг зөрчсөн гэх хэргээр Химкинскийн хотын шүүхэд нэхэмжлэл гаргасан. Харин энэ сарын 18-нд болсон шүүх хурлаар түүнийг 30 хоног баривчлах шийдвэр гаргасан аж.

Улмаар түүнийг нутагтаа очиход нь саатуулж, урьдчилан цагдан хорих төвд хориод байгаа юм.

В.Путины эдлэн газар

А.Навальныйг саатуулагдсаны дараа түүний хамтрагчид Хар тэнгисийн эрэг дэх Оросын төрийн тэргүүн В.Путины нууц ордны тухай дүрс бичлэгийг Youtube сувгаар цацжээ. Одоогийн байдлаар уг бичлэгийг 66 сая хүн үзээд байна. Дүрс бичлэгт нэгэн баян бизнесмэн В.Путинд уг харшийг бэлэглэсэн гэж мэдээлжээ.

Эдлэн газрын нийт талбай долоон га. Энэхүү харш нь өвлийн ордон, казино,сүм, нисэх талбай, театр, спорт заал, хоккейн цогцолбор, усан сан, метроны зам, гүүр, дарсны агуулах, ашиглалтын болон ажилчдын байр, хамгаалалтын өндөр хашаа, цэцэрлэгжүүлэлт, усан боомт зэргээс тогтох аж. Урьдчилсан тооцоогоор харш бүхий цогцолборын нийт өртөг нь 1.3 тэрбум ам.доллар. А.Навальныйн үзэж буйгаар В.Путин авлигын мөнгөөр уг байгууламжийг авсан байх магадлалтай гэжээ.

Харин Кремлийн хэвлэлийн албанаас дээрх дүрс бичлэгийг ашиг хонжоо олох зорилгоор А.Навальный бүтээсэн хуурамч баримт хэмээн тайлбарласан байна.