2020 онд БНХАУ коронавирусын цар тахлын үед эдийн засгаа хурдацтай сэргээж чадсан цорын ганц улс болсон билээ. Тэгвэл Хятадын Ерөнхий сайп Ли Көцян Бүх Хятадын Ардын Төлөөлөгчдийн их хурлаар БНХАУ 2021 онд эдийн засгаа 6-аас дээш хувиар өсгөх зорилт тавьсан талаар мэдэгджээ.

Коронавирусын цар тахлаас үүдэлтэй эдийн засгийн уналтын үед бусад томоохон эдийн засагтай улс орнуудаас түрүүлж эдийн засгаа сэргээж чадсан Хятад улсын хувьд 2020 онд эдийн засаг нь 2.3 хувиар өссөн билээ. Тэгвэл Бээжингийн 2021 онд тавиад буй зорилт нь Ерөнхийлөгч Си Жиньпины эдийн засгийн урт хугацааны зорилтыг биелүүлэхэд хангалттай хэмжээний тоо юм. 2035 он гэхэд Хятадын ДНБ-ий хэмжээг 2 дахин нэмэгдүүлэх Ерөнхийлөгч Си Жиньпины төлөвлөгөөг биелүүлэхийн тулд Хятадын эдийн засаг ирэх 10 жилд тус бүр 5 орчим хувиар өсөхөд л хангалттай аж.

Өнгөрсөн жил Бээжин дэд бүтцийн томоохон төслүүдийн санхүүжилт, иргэдэд өгөх тэтгэмж зэрэг эдийн засгаа сэргээх хөтөлбөрүүдэд нийт хэдэн зуун их наяд ам. долларыг зарцуулсан юм. Гэсэн хэдий ч Хятадын 2020 оны эдийн засгийн өсөлтийн үзүүлэлт нь Хятадын түүхэн дэх хамгийн муу үзүүлэлт болон тэмдэглэгдэн үлдсэн юм. Эдийн засгийн өсөлтөнд нөлөөлж буй гол хүчин зүйлүүдийн нэг нь иргэдийн худалдан авалт буурсан явдал юм. БНХАУ нь дэлхийн бусад улс орнуудтай харьцуулахад коронавирусын халдварыг бүрэн биш ч хяналтандаа авч чадсан билээ. Тэгсэн хэдий ч иргэдийн дунд мөнгөө үрэхээс болгоомжлох хандлага одоог хүртэл байсаар байгаа аж. Үүнээс гадна Хятадын коронавирусын эсрэг дархлаажуулалтын томоохон аяныг дурдахгүйгээр өнгөрч болохгүй юм.

Өнөөдрийн байдлаар Хятадын нийт 1. 4 тэрбум хүн амын 3.5 хувь нь л коронавирусын эсрэг вакцинд хамрагдаад байгаа ба эрх баригчид ирэх 6-р сарын сүүл гэхэд хүн амынхаа 40 хувийг вакцинд хамруулах зорилт тавиад байгаа аж. Хятадын эрх баригчдын хувьд 2021 онд эдийн засгийн бодлогодоо ямар нэг онцын өөрчлөлт хийхгүй гэдгээ мэдэгджээ.

Эх сурвалж: CNN