Энэ жил ардын хувьсгалын зуун жилийн ой тохиож байгаа билээ. Наадмыг цахимаар, үзэгчгүй зохион байгуулна гэсэн бөгөөд 150,000 иргэнд ардын хувьсгалын зуун жилийн ойн медалийг гардуулна хэмээн тогтоолын төсөл УИХ-д өргөн мэдүүлээд байгаа билээ. 

Анхнаасаа л хэл ам дагуулсан уг медалийг хийхэд зориулж 975 сая төгрөг төсөвлөжээ. Уушги орлуулагч гуравхан аппараттай, үхэл амьдралын зааг дээр байгаа өвчтнүүдээр эмнэлэгүүд нь ''хахаж, цацаж'' байхад 150,000 хүнд медаль хийлгэх гээд 975 сая төгрөг төсөвлөөд явж байдаг төрийн нүүр царай ийм л байна. Угтаа бол 25-78 сая төгрөгийн хооронд үнэтэй уушги орлуулагч аппаратыг энэ мөнгөөр доод тал нь 12 ширхэгийг авч болмоор. 

Энэ асуудлаар УИХ-ын гишүүн М.Оюунчимэг өөрийн үзэл бодлоо илэрхийлээ.

''Монгол Улсын тусгаар тогтнол, эрх чөлөө гээд үнэхээр түүхэн чухал үйл явдал. Долдугаар сарын 11-нд бид тэмдэглэх тухай ярьж байна л даа. Монгол Улсын түүх тусгаар тогтнол, эрх чөлөө энэ бүх талаасаа аваад үзэхэд энэ бол маш утга төгөлдөр, чухал арга хэмжээ байгаа. Мэдээж ковид19 цар тахлын үед бид иргэдээ асуудлыг зөв зохион байгуулж, дэглэмээ барьж, наадам зохион байгуулах асуудлууд бол цаанаа тусгай хийгдэх байх. Зyyн жилийн медаль бий болгох тогтоолын төслийг бид хэлэлцэж байна. УИХ-аар хэлэлцэж байж, төсөв мөнгийг нь баталж байж энэ медалийг хэдийг хийх вэ, яаж хийх вэ, хаана хийх вэ гээд энэ асуудлууд бол гарч ирнэ шүү дээ. Медаль бий болгох нь зайлшгүй, нэн чухал учраас би зуун хувь дэмжиж байгаа.

Хүмүүс ардын хувьсгалын зуун жил, тусгаар тогтнолын эрх чөлөөгөө олсны зуун жилийн медаль хүртсэн гээд наад зах нь баярлана, энэ чинь өөрөө ач холбогдлоороо ч гэсэн, үнэлэмжээрээ ч гэсэн, үнэ цэнээрээ ч гэсэн чухал медаль л даа. Үүнийг арай жаахан даруухан хийчихсэн юм уу, эсвэл жаахан тодотгох юм уу?хэмээсэн юм. Харин үүнд Соёлын Яам ийн хариуллаа.

''Загвар үндсэндээ батлагдсан гэж ойлгож болно. Их хурлын тогтоол албажсанаар бид үйлдвэрлэх процесст орно. Хэрвээ үүнийг хурдан шийдээд, шийдвэр нь гарчихвал, үндэсний их баяр наадмаар түрүүч нь гараад олгогдох боломжтой болно.''