Нийслэлийн эрүүл мэндийн газраас “Энэрэл” эмнэлгийн гадаа яаралтай тусламж авч чадалгүй нас барсан иргэний талаар мэдээлэл хийлээ. Мэдээлэлдээ “Өчигдар харамсалтай хэрэг боллоо. Талийгаачийн ар  гэрт эмгэнэл илэрхийлье. Талийгаач долдугаар сарын 2-нд “Хатагтай” эмнэлэгт коронавирусийн түргэвчилсэн шинжилгээ өгч эерэг гарсан байсан. Уушгины рентгенээр хатгалгаатай гарсан. Тус иргэн Чингэлтэй дүүргийн VI хорооны 50 дугаар байранд оршин сууж, ажилладаг байсан. Харин үндсэн харьяалал нь Баянзүрх дүүргийн XXVIII хороо. Иргэний амьдарч байсан VI хорооны өрхийн эмнэлэг тус байрнаас 10 метрийн зайд оршдог. Хэсгийн ахлагчийн мэдээлснээр “Нас барсан иргэн 50 дугаар байрны орцонд алтны дархан хийдэг, амьдрах орчин муу. Сүүлийн 10 хоног архи согтууруулах ундаа хэрэглэж байсан" гэсэн байна. Талийгаач долдугаар сарын 2-ны 09.30 минутад  Түргэн тусламж дуудахад түргэний эмч "Уушгины хатгаа байна. Харьяа дүүргийнхээ Эрүүл мэндийн төвд хандах хэрэгэтэй" гэж зөвлөжээ. Ийнхүү талийгаач ахын хамт Баянзүрх дүүргийн нэгдсэн эмнэлэг болон “Энэрэл” эмнэлэгт тусламж авахаар очсон байна.

     Баянзүрх дүүрэгт байрлах “Энэрэл” эмнэлэг нь ковидын өвчтнүүдийг эмчилж байгаа бөгөөд өнгөрсөн хугацаанд 244 хүнийг эмчилж эдгээсэн байна. Харин одоогийн байдлаар коронавирусийн халдвартай 76 хүнийг эмчилж байгаа аж. Гэвч  35 настай, эрэгтэй Р-д өчигдөр яаралтай тусламж үзүүлээгүйн улмаас эмнэлгийн гадна нас барсан. Иймээс “Энэрэл” эмнэлгийн дарга болон тус эмнэлгийн Яаралтай тусламжийн даргад Эрүүл мэндийн тухай хуулийн 28.4.2-г зөрчсөн тул хариуцлага тооцжээ. Мөн Нийслэлийн Эрүүл мэндийн газрын дарга М.Мөнхдэлгэрийг ажлаас чөлөөлөх арга хэмжээ авсан байна. Баянзүрх дүүргийн нэгдсэн эмнэлэг энэ мэт зөрчлийг удаа дараалан гаргаж байгаа тул яаралтай арга хэмжээ авна гэж мэдэгдлээ.