ERGELT.mn

Ерөнхийлөгч У.Хүрэлсүх 2018 оны эхээр буюу Ерөнхий сайд болсноосоо гурван сар гаруйн дараа төрсөн дүү У.Отгонбаярыгаа Барилга, хот байгуулалтын яамны газрын даргын албан тушаалаас чөлөөлүүлж байв. Ингэхдээ “Ах нь төрийг тогтолцоогоор нь өөрчлөх зорилготой явж ирсэн. Тийм ч учраас ах дүү хоёр зэрэгцээд төрийн албанд ажиллах нь ашиг сонирхлын зөрчил. Миний дүү энэ ажлаа өгөөд хувийн бизнес хий” гэж ятгаж, дүү ч ахынхаа гуйлтыг зөвшөөрч, албан тушаалаа чимээгүйхэн өгчихөөд явсан гэдэг.  Төрийг төрлийн алба болгож, ургийн мод мөчирлүүлэгчид хэдэн арваараа байхад “Ах дүү хоёр зэрэгцээд төрд ажиллах нь ашиг сонирхлын зөрчил” хэмээн ах нь ятгаж, дүү нь зөвшөөрсөн гэх энэ уярам, бахдам түүх У.Хүрэлсүхийн улс төрийн карьерыг суга өсгөж, түүнийг ах дүү, амраг саднаа төрд шургуулах хүн биш гэж ард түмэн бат итгэсэн дээ. 

Тэгвэл төрсөн дүүгээ ч төрийн албанаас “хөөж” чаддаг “шударга” дүрээр Ерөнхийлөгч болтлоо дэвшсэн У.Хүрэлсүх үнэн хэрэгтээ төрийн албыг төрлийн алба болгох үйлсэд хүчин зүтгэж яваа нэгэн ажээ. Тодруулбал, Ерөнхийлөгч У.Хүрэлсүх эцэг эхээс тавуулаа, нэг ах, нэг эгч, хоёр эрэгтэй дүүтэй. Том ах У.Ганболд нь насаараа тээврийн жолооч хийсэн бөгөөд өдгөө тэтгэвэртээ суусан, хааяа хувийн машинаараа таксинд явдаг гэх. Тэгвэл түүний хоёр хүү Г.Гантулга, Г.Гандөл нар нь авга ах У.Хүрэлсүхийгээ дагаж, хэрхэн төрийн албанд “томорч” байгааг харъя. 

У.Хүрэлсүхийн төрсөн ах У.Ганболдын бага хүү Г.Гандөл нь У.Хүрэлсүхийн УИХ-ын гишүүн болсон цагаас нь тасралтгүй дагаж иржээ. Тухайлбал, 2003-2004 онд авга ах, УИХ-ын гишүүн У.Хүрэлсүхийнхээ зөвлөхөөр ажиллаж эхэлсэн байна. Гэхдээ Г.Гандөл 2003 онд Сүхбаатарын нэрэмжит нийслэлийн II сургуулийг төгссөн гэхээр арван жилийн сургуулиа төгсмөгцөө УИХ-ын гишүүн авга ахдаа зөвлөж эхэлсэн болж таарах нь. Ахлах ангиа дөнгөж төгссөн, их сургууль ч элсэж амжаагүй “хүүхэд”-ээр УИХ-ын гишүүний ажлыг зөвлүүлнэ гэж авга ах У.Хүрэлсүх нь яаж бодож чадсаныг гайхаад олсонгүй. Г.Гандөл үргэлжлүүлэн 2017-2018 онд Засгийн газрын хэрэг эрхлэх газарт Шадар сайд У.Хүрэлсүхийн зөвлөх, 2018-2019 онд Ерөнхий сайд У.Хүрэлсүхийн Ажлын албанд референт, 2019-2020 онд Ерөнхий сайд У.Хүрэлсүхийн Шадар туслах, 2021 онд Ерөнхийлөгч У.Хүрэлсүхийн туслахаар ажиллаж, өнгөрсөн наймдугаар сард Ерөнхийлөгчийн Тамгын газрын Зохион байгуулалт, үйл ажиллагааны газрын даргын албан тушаалд томилогджээ. 

Авга ах У.Хүрэлсүхийнхээ дэргэдээс салаагүй, зөвлөх, туслахаар нь туж ажилласан намтартай Г.Гандөл 2017 оны Хөрөнгө орлогын мэдүүлэгтээ 295 сая төгрөгийн гурван орон сууцтай, 165 сая төгрөгийн үнэтэй Мерседес бенз- S500, Лексус-RX400 загварын хоёр автомашинтай, 975 сая төгрөгийн хадгаламжтай гэж мэдүүлжээ. Өнөөгийн нийгэмд насаараа бизнес эрхэлсэн хүн ч тэрбум шахуу төгрөгийн хадгаламж, тансаг зэрэглэлийн хоёр автомашинтай болж чадахгүй байгаа. Гэтэл авга ахыгаа дагаж, төрийн албанд туслахын ажил “насаараа” хийсэн Г.Гандөл яаж ийм хөрөнгөтэй болсон хэрэг вэ. Хувийн бизнес эрхэлдэг эсэхийг шүүж үзвэл УИХ-ын гишүүн Ц.Анандбазарын төрсөн дүү, “Сод Монгол” группын гүйцэтгэх захирал Ц. Пүрэврэнчинтэй хамт “Ай Ви Жей” ХХК-ийг эзэмшдэг юм байна. Мөн Ерөнхийлөгч У.Хүрэлсүхийн эхнэр Л.Болорцэцэгтэй хамт “Илт хан” ХХК-ийн эзэмшиж байгаад хувь эзэмшлээс нэрээ хасуулжээ. Сонирхуулахад, Ерөнхийлөгч У.Хүрэлсүхийн эхнэр Л.Болорцэцэгийн эзэмшлийн “Илт хан” ХХК нь саяхан Тэрэлжид тансаг зэрэглэлийн “Бугат” жуулчны бааз байгуулан ажиллаж байгаа юм. 

Ерөнхийлөгч У.Хүрэлсүхийн төрсөн ах У.Ганболдын том хүү Г.Гантулга Зам, тээврийн хөгжлийн яамны Авто тээврийн бодлогын хэрэгжилтийг зохицуулах газрын дарга, тус газрын Тээвэр зохион байгуулалтын хэлтсийн даргаар ажиллаж байгаа нэгэн. Чухамдаа Монголын Улсын авто тээврийн салбарын бүх зангилааг атгаж, төрөөс тээврийн салбарт барьж буй бодлогыг хэрэгжүүлэх чухал үүрэгтэй хүн гэсэн үг л дээ. Өмнө нь тэрбээр ШӨХТГ, Засгийн газрын хэрэгжүүлэгч агентлаг Авто замын газарт ажиллаж байсан намтартай. 

Түүний хувьд авга ах У.Хүрэлсүхийгээ “өвчсөн” мэт дуурайсан нэгэн ажээ. Хөдөө, гадаа хаа л явна цэргийн десант хувцас өмсөж, төрсөн хүүтэйгээ хүртэл цэргийн ёсолгоогоор мэндэлдэг, амарсан үедээ хилийн баганын дэргэд очиж ёсолдог ажээ.

Тэрбээр 2017 онд жилд 124 сая төгрөгийн орлоготой гэж мэдүүлж байсан бол 2019 онд 60 сая төгрөг болж буурсан мэдээлэлтэй, “Ирээдүй фарм” ХХК гэх эхнэр Ц.Отгонжаргалынхаа эзэмшлийн эмийн компанид хувьцаа эзэмшдэг аж. Гэхдээ Ганболдын Гантулга нэр дээр хэдэн арван компани бүртгэлтэй байдгийг хэлэх нь зүйтэй болов уу. 

Төрсөн ах У.Хүрэлсүхийнхээ улс төрийн замыг засаж, Барилга, хот байгуулалтын яамны газрын даргын албан тушаалаа сайн дураараа өгсөн гэх “баатарлаг” намтартай У.Отгонбаяр өнгөрсөн аравдугаар сард Сүхбаатар аймгийн Улаанбаатар хот дахь Нутгийн зөвлөлийн даргаар томилогдсон. Сүхбаатар аймгийн улс төр, бизнесийн томчуудыг багтаасан нутгийн зөвлөлийг У.Отгонбаяр толгойлж эхэлснээрээ ирээдүйн улс төрд бэлдэж байна гэж тус аймгийнхан жиг жуг хийцгээж буй. Шинэ дарга У.Отгонбаяр Улаанбаатар хот дахь Сүхбаатар аймгийн нутгийн зөвлөлийнхөн  өргөтгөсөн хурлаа хийж, сумдын тэргүүлэгчдээ томилсон. Шинэ даргад баяр хүргэж, УИХ-ын гишүүн Ж.Чинбүрэн, Ж.Батсуурь, Н.Ганибал, УИХ-ын гишүүн асан, ХХААХҮ-ийн сайд асан Ч.Улаан, Зам, тээврийн сайд асан М.Зоригт болон Сүхбаатар аймгаас гаралтай бизнесменүүд цугласныг дурдах нь зүйтэй байх. У.Хүрэлсүх төрсөн дүү У.Отгонбаярыгаа төрийн албанаас ямар "тохироогоор" явуулсан нь зөвхөн тэдний мэдэх нууц. Гэхдээ ЖДҮХС аль яаманд хамаарна, тэнд У.Отгонбаярыгаа газар, хэлтсийн даргаар "томилж" явсан гэгддэг. Өөрөөр бол, У.Хүрэлсүх төрсөн дүү У.Отгонбаяртаа тийм амь. Тэгвэл төрсөн дүүгээ төрийн албанаас явуулахаар ятгахдаа "Ах нь Ерөнхийлөгч болмоор байгаа учраас түр албан тушаалаа өгчих, ирээдүйд чамайг УИХ-ын гишүүн болгоно" гэх тохироо хийж, түүнийхээ эхлэл болгож Сүхбаатар аймгийн нутгийн зөвлөлийг хариуцуулж байж ч болох гэх хардлага байна. 

Ерөнхийлөгч У.Хүрэлсүх өөрийгөө “Тостой жолоочийн удмынх” хэмээн ярьж, “Эгэл ардын хүү” гэх имиж бүрдүүлэх дуртай. Тэгвэл тостой жолоочийн удмынхан өдгөө төрийн тэргүүн, төрийн албанд дарга нар болцгоож байгаа нь энэ. Зөвхөн том ах У.Ганболдынх нь хоёр хүү, төрсөн дүү У.Отгонбаярынх нь тухай цухас дурдахад л ийм байна. Үүнээс гадна “Тостой жолоочийн удмынхан”-ы бизнесийн хариуцаж, нууцхан амьдардаг У.Давхарбаяр гэгчийн тухай таагүй яриа олон сонсогддог билээ. Бид дараагийн дугаартаа "Тостой жолоочийн удмынхан"-ы тухай илүү дэлгэрүүлэн хүргэх болно.