Туркийн Истанбул хотноо өчигдөр Орос, Украины төлөөлөгчдийн уулзалт болсон. Уулзалтын дараа Украины умард хэсэгт ОХУ цэргийн ажиллагаагаа бууруулна гэж Оросын Батлан хамгаалах яамны төлөөлөгч мэдэгджээ.

Оросын төлөөлөгчдийн тэргүүн Владимир Мединский "Оросын тал хэлэлцээрт тусгах Украины зарим саналыг хүлээн авсан. Эдгээр саналыг ойрын хугацаанд авч үзэж, дараа нь Ерөнхийлөгчид өргөн барьсны дараа бид хариу өгөх болно" гэжээ.

Уулзалтын үр дүнд Оросын Батлан хамгаалах яам Киев болон Черниговын чиглэлд цэргийн ажиллагааны цар хүрээг бууруулахаар болсон тухай мэдэгдсэн байна.

Харин Украины төлөөлөгч Александр Чалый "Энхийн гэрээ байгуулахын тулд Украинд бүх нийтийн санал асуулга явуулж, иргэд гэрээг дэмжих, эс дэмжихээ илэрхийлэх ёстой" гэж мэдээлжээ. Хэлэлцээр байгуулахын тулд галыг бүрэн зогсоох ёстой бөгөөд үүний дараа Украины парламент болон батлан даагч орнуудын парламент баталгаажуулах ёстой гэнэ.

Түүнчлэн Оросын төлөөлөгч Владимир Мединский Ерөнхийлөгч Владимир Путин болон Володимир Зеленський нарын уулзалтыг Гадаад хэргийн сайд нарын түвшинд гэрээг эхлүүлэхтэй зэрэгцүүлэн хийх санал гаргасан байна. Украины Ерөнхийлөгч Володимир Зеленськийн Оросын Ерөнхийлөгч Владимир Путинтэй уулзах саналыг Оросын тал өнөөг хүртэл хүлээж аваагүй байсан юм. Мөн талууд Крым, Донбассын асуудлыг тусад нь хэлэлцэхээр тохиролцсон байна.

Түүнчлэн Украины тал дараах саналыг дэвшүүлжээ. Үүнд:

• Крым, Севастополийн статусын талаарх хэлэлцээ 15 жил үргэлжилнэ, талууд энэ асуудлыг шийдвэрлэхийн тулд зэвсгээс татгалзана;
• "Бүгд найрамдах ард улс" гэгддэг бүс нутгуудын статус, тэдгээрийн цаашдын асуудлыг тусдаа хэсэгт оруулсан бөгөөд үүнийг хоёр улсын Ерөнхийлөгч биечлэн уулзахдаа хэлэлцэх боломжтой;
• Украин улс хэд хэдэн улсаас тодорхой бөгөөд хатуу баталгаатай нөхцөлд цөмийн зэвсэггүй орны статустай болохыг зөвшөөрөхөд бэлэн байна.
• Өмнөх зүйлд (хэрэв энэ талаар тохиролцоонд хүрсэн бол) Украины нутаг дэвсгэрт гадаадын цэргийн бааз, цэргийн анги нэгтгэлүүдийг байрлуулахгүй байхаар тусгасан.
• Украин цэрэг-улс төрийн ямар ч холбоонд орохгүй байх үүрэг хүлээдэг. Украины нутаг дэвсгэрт олон улсын цэргийн сургуулилалтыг зөвхөн батлан даагч орнуудын зөвшөөрлөөр явуулж болно.