Коронавирусын халдварыг цааш тархаахгүйн тулд маш олон оронд роботыг хэрэглэж эхлээд байгаа бөгөөд энэ нь роботын үсрэнгүй хөгжлийг улам л хурдасгасан юм. Энэ хөгжил цаашид үргэлжилсээр бид удахгүй хүмүүст тусалдаг роботуудтай болно гэж судлаачид үзэж байна.
Калифорнийн Их сургуулийн профессор Хенрик Кристенсен багийнхны хамтаар хэрхэн роботыг ашиглаж цар тахлын үед эрсдэлтэй ажлуудыг хийлгэж болохыг судалж байгаа юм. Мөн түүнчлэн зарим технологийн өндөр хөгжил бүхий БНХАУ зэрэг орнууд роботыг тусгаарлалтад байгаа өвчтөнүүдэд хоол, эм болон халдваргүйжүүлэгч зэргийг хүргэх болон зүрхний цохилт зэрэг цаг тутмын үзлэгийг хийхэд ашиглаж байгаа билээ.
Мөн түүнчлэн халдвар байж болох эрсдэл бүхий биет, хүн, цэгүүдийг тодорхойлох зориулалт бүхий бичил роботуудыг ч бүтээхээр шаргуу ажиллаж байгаа аж. Ингэснээр цаашид илүү цэвэр, аюулгүй орчинд амьдарна гэж зохион бүтээгчид үзэж байгаа юм.
Мэргэжилтнүүдийн үзэж байгаагаар бид коронавирусээс хойш үед ч гэсэн дасан зохицож амьдрах магадлал өндөртэй болж ирсэн учир цаашид роботууд, хиймэл оюун, дрон зэргийг илүү өргөнөөр өдөр тутмынхаа хэрэгцээнд ашиглана гэж үзэж байгаа юм. Тийм ч учраас бид уг технологийн дэвшилд илүү их хөрөнгө төсөвлөж ижил төрлийн цар тахал болон гамшгийн үед биднийг аюулгүй байлгах, аюулын үед аврах ажиллагаа зэргийг хийх технологийг нэн даруй бүтээж эхлэх хэрэгтэй гэж үзэж байгаа юм.
Түүх давтагддаг гэдэг шиг Хар тахал, Испани ханиад, H1N1 эсвэл Эбола зэрэг цар тахал дахиад үүсэх эсэх нь цаг хугацааны л асуудал юм. Харин тэр үед роботууд бидэнд туслахаар бэлэн байх болов уу гэдэг нь өнөөдрийн бидний бүтээн байгуулалтаас л хамаарах юм.
Эх сурвалж: Independent.co.uk
Манай сайт "ХИЙМЭЛ ОЮУН" -н салбарт хийгдэж буй шинэ содон бүтээл үйл явдлуудыг цаг алдалгүй хүргэж байхаар болсон тул та бүхэн энэ салбарын мэдээллийг ЭНД дарж үзээрэй
