УИХ дахь Ардчилсан Намын бүлэг өнөөдөр хуралдаж, гаргасан шийдвэрүүдээ танилцууллаа. 

АН-ын бүлгийн дарга О.Цогтгэрэл "УИХ-аас сүүлийн үед гарч буй шийдвэрүүд нь сонгуульд зориулсан, шууд иргэдэд мөнгө тараахаар шийдсэн байна. УИХ-аар хуулиудыг зөрчсөн, зөрчилтэй хууль гаргах замаар сонгогчдын саналд нөлөөлөхийг оролдлоо. 

Монголын мал аж ахуйд шинэчлэл хийх ёстой гэдэгт санал нэгддэг. Хийж буй арга хэрэгсэл, цаг хугацаа нь сонгууль руу чиглэгдэж байна. Малчдыг зээлийн харилцаа руу бус өр рүү чирч оруулахаар байна. 

Сонгууль бүрээр С.Зориг агсантай холбоотой улс төр яригддаг. Үүнээс нэг улс төрийн хүчин хожиж байдаг. Нэг нь буруутан болдог. Энэ хэргийн материалыг одоо хүртэл ил болгодоггүй. 

С.Зориг агсны хэргийг нээлттэй болгохоор манай бүлгийн гишүүд байр сууриа илэрхийлж, албан бичгээр шаардана" гэв. 

"Одоо эцсийн найдвар АН гэсэн хүлээлт бий болсныг бид мэдэж байгаа. МАН-ын нэр хүнд маш их унасан"

Үргэлжлүүлэн С.Зориг агсны хэрэг болон эрх баригч намтай холбоотой асуудлаар УИХ-ын гишүүн Д.Ганбат байр сууриа илэрхийлэв. 

Тэрбээр "Сүүлийн үед болж буй нөхцөл байдлыг орон даяар харлаа. Хэд хэдэн нэвтрүүлгийг 18, 19 телевизээр цагийг нь давхцуулж, сонголтгүйгээр явууллаа. 

Ард түмнийг бухимдуулж, хувааж байна. Энэ нь цаашдаа үндэсний аюулгүй байдлын хэмжээнд нөлөөлнө. 1998 оны аравдугаар сарын 2-ны өдрөөс хойш 26 жил өнгөрсөн. Энэ хугацаанд тухайн аллагын эзэд илэрсэн эсэхэд олон нийтийг эргэлзээтэй байдалд оруулсан. 

Ардчилсан Намын бүлгээс С.Зориг агсны аллагатай холбоотой хэргийг нууцаас гаргаж, ил болгох асуудлаар Үндэсний Аюулгүй Байдлын Зөвлөлд албан бичиг явуулахаар боллоо. 

2000 оноос цагдаагийн дарга байсан хүн МАН ялахгүй бол С.Зоригийн хэрэг илрэхгүй гэсэн. МАН-ын нэр хүнд маш их унасан байна. Уг нь өнгөрсөн найман жилийн тайлангаа тавиад сонгуульд оролцох ёстой. 

Гэтэл улиг болсон, ард түмнийг залхаасан байдалтай оролцох нь. Жишээлбэл сайн сагсан бөмбөгчийн төлөөллөөр нөлөөллийн арга үзүүлэх гээд сурталчилгаа явуулахад дэмжигчид нь хүлээж авсангүй.

Дараа нь шарк, бизнес хийдэг хүнээр нөлөөлөх гээд бүтсэнгүй. Рок попын дуучнаар зүгээр сайхан концерт үзье гээд ирж байхад тэр зүйлийг хэлэхэд дэмжигчид нь дургүйцлээ. Монголбанкны ерөнхийлөгч аснаар янз бүрээр эдийн засгийн нөхцөл байдлыг толгой угаах маягаар хандсан ч гэсэн нийгэм хүлээж авахгүй байна. 

Монголын ард түмэн эрх чөлөө, ардчиллаар амьсгалаад 33 жил амьдрахдаа толгойгоо угаалгахгүй дархлаа суужээ. Ардчиллын үнэт зүйлийг тээгчид рүү маш их заналхийлж байна. 

Б.Булган гуай өөрөө хэлсэн ч юм уу, хэлүүлээд байгаа гэдгийг нь би сайн мэдэхгүй. Тухайн ярилцлагыг хөтөлж байгаа хүн нь Ерөнхий сайд Л.Оюун-Эрдэнийн хэвлэлийн хэлтсийн дарга, Ерөнхийлөгч асан Х.Баттулгын Хятад хэлний орчуулагч гэх мэдээлэл олон нийтийн сүлжээнд явж байна. 

Ардчиллын бэлгэ тэмдэг болсон Э.Бат-Үүлийн ар гэрийг заналхийлсэн. Араа даагаарай, аятайхан идэж уугаад амьдар гэх шиг. Үүнийг заналхийлэл гэж бодсон. Ар гэр, үр хүүхдүүд нь бас олон нийтийн сүлжээнд тавьсан.

Ардчилсан Намын бүлэг энэ дөрвөн жил боломжийн ажилласан. Өнөөдөр ард түмний итгэлийг хүлээж чадахуйц хоёр л нам байна. Нэг нь Азийн хамгийн ууган нам гэх МАН. Нөгөө нь ардчиллаас хойш төрсөн Ардчилсан Нам. Одоо эцсийн найдвар АН гэсэн хүлээлт бий болсныг бид мэдэж байгаа" гэв.

 

 

 

 

Н.ЭРХБАЯР IKON.MN