УИХ-ын сонгуулийн XII тойрог буюу Хан-Уул дүүрэг гурван мандаттай. Тус тойргоос 2020 онд НИТХ-ын төлөөлөгч асан Б.Түвшин, АН-ын дэд дарга Ч.Өнөрбаяр, Хуульч Т.Энхсайхан гурав нэр дэвшсэн ч УИХ-ын гишүүн Г.Амартүвшин, Д.Сарангэрэл, Т.Доржханд гуравт ялагдсан. Харин 2016 онд дөрвөн мандаттай байсан бөгөөд Хан-Уул дүүргийн Засаг дарга асан Ж.Ганхуяг, БХБ-ын дэд сайд асан Н.Байгалмаа, Элчин сайд Лу.Болд, Г.Батхүү агсан дөрөв нэр дэвшсэн. Ингээд Лу.Болд АН-ыг төлөөлөн ганцаараа, МАН-аас Ц.Нямдорж, Д.Сарангэрэл, Б.Энх-Амгалан гурав сонгогдож байв. 

Тэгвэл ирэх сонгуулийн Хан-Уул дүүргийн гурван мандатад Хан-Уул дүүргийн Засаг дарга асан Ж.Ганхуяг, “Хашаандаа сайхан амьдръя” ТББ-ын тэргүүн Ц.Түмэнбаяр, Эрүүл мэндийн дэд сайд асан Ж.Амарсанаа, Хууль зүй дотоод хэргийн сайд Х.Тэмүүжин, НИТХ-ын төлөөлөгч асан П.Батчимэг, Ерөнхийлөгч асан Х.Баттулгын хүргэн О.Тэнүүн нар горилж байна. Харин тэднээс АН доторх аав, ахын нөлөө, албан тушаал хашиж байсан намтар зэргээрээ Х.Тэмүүжин, П.Батчимэг, О.Тэнүүн гурвын мандах халааслах магадлал өндөр ажээ. 

ХУУЛЬ ЗҮЙН САЙД АСАН, ХОЁР УНАСАН Х.ТЭМҮҮЖИН

Хууль зүйн сайд асан Хишигдэмбэрэлийн Тэмүүжин- Төв аймагт төрж өссөн. 1998 оноос МУИС-ийн Хууль зүйн сургуульд багш, 2004 оноос “Нээлттэй нийгэм” ТББ-ын тэргүүн болон АН-ын Нарийн бичгийн даргаар ажиллаж байгаад 2008 оны УИХ-ын сонгуулиар Баянгол дүүрэгт АН-аас нэр дэвшиж сонгогдсон. Харин 2012 оны УИХ-ын сонгуулиар АН-ын жагсаалтын гуравдугаарт бичигдэж, УИХ-ын гишүүнээр улирсан. Ингээд 2012-2014 онд Хууль зүйн сайдаар давхар ажиллаж байв. Хууль зүйн сургуулийн багшаас Хууль зүйн сайд болтлоо дэвшиж чадсан ч сайдын суудлаас нэр муутай буусан. Ямар асуудлаар гэдгийг нь ядах юмгүй санаж буй байх. 

   Тиймдээ ч Х.Тэмүүжин 2016 оны УИХ-ын сонгуулиар Баянгол дүүргээ Сүхбаатар дүүргээр сольж, Лу.Гантөмөр, Б.Мэдрээ хоёртой ханьсаж нэр дэвшсэн боловч унасан. Улмаар 2020 оны УИХ-ын сонгуулиар тойрогтоо дахин сольж, төрөлх Төв аймагтаа Ц.Туваантай ханьсаж нэр дэвшээд мөн л унасан. Тиймдээ ч Х.Тэмүүжин ирэх сонгуулиар гурав дахиа унахгүйн тулд сошиалд хэд хэдэн хаяг зэрэг хөтөлж, ярилцлагын видеонуудаа завсаргүй цацаж, сонин, сайт, телевизийн ярилцлагуудад ч тасралтгүй орж байгаа. Уг нь Х.Тэмүүжин УИХ-д хоёр суусан, Хууль зүйн сайд байсан гэдгээрээ намын жагсаалтад бичигдэх боломжтой ч 2012 онд жагсаалтын боломжоо ашиглачихсан учраас ийн тойрогт горилж буй гэх. 

 

Х.Тэмүүжин нэр дээрээ “Ханан ар” ХХК гэх ганц компанитай. “Ханан ар” ХХК нь Хан-Уул дүүрэгт буудлагын төв ажиллуулдаг. 

Г.БАТХҮҮ АГСНЫ ДҮҮ, “АПУ”-ГААР ОВОГЛОДОГ П.БАТЧИМЭГ

НИТХ-ын төлөөлөгч асан Пүрэвийн Батчимэг- Өвөрхангай аймгийн Хужирт суманд төрж, өссөн. Орос хэлний багш мэргэжилтэй, 1988-1995 онд Өвөрхангай аймгийн Арвайхээр хотын II сургуульд, 1995-2000 онд Цагдаагийн академид тус тус багшилсан. Дараа нь, 2000-2003 онд БШУЯ-нд мэргэжилтнээр гурван жил ажилласан. Ингээд 2004 оноос “АПУ импекс” ХХК-ийн Ерөнхий захирлаар, 2007 оноос “АПУ трейдинг” ХХК-ийн Гүйцэтгэх захирлаар ажиллаж эхэлсэн. Улмаар 2008 онд НИТХ-ын төлөөлөгчөөр сонгогдож, 2012, 2016 онуудад НИТХ-ын төлөөлөгчөөр хоёр улирсан. 2020 оны УИХ-ын сонгуулиар Дорнод аймагт очиж нэр дэвшсэн ч Х.Болорчулуун, Ц.Сэргэлэн хоёрт ялагдаж, хоосон хоцорсон. Мөн 2020 оны УИХ-ын сонгуулиар төрсөн ахынх нь хүү буюу УИХ-ын гишүүн асан Г.Батхүү агсны Б.Ганхөлөг Өвөрхангай аймагт АН-аас мөн л унаж байв.  П.Батчимэг “Гофро” ХХК, “Натур зэт агро” ХХК-ийг эзэмшдэг. “Гофро” ХХК нь дотоодын бараа, бүтээгдэхүүний цаасан хайрцагны зах зээлийг дангаараа шахуу хангадаг. “Натур зэт агро” ХХК нь Дорнод аймгийн Хөлөнбуйр суманд махны чиглэлийн халимаг үүлдрийн үхрийн ферм болон улаанбуудай, ногоон тэжээл тариалдаг. 

Х.БАТТУЛГЫН ХҮРГЭН О.ТЭНҮҮН

“Оюуны ундраа пропертийз” ХХК-ийн Ерөнхий захирал Отгонбаярын Тэнүүн- Аав нь Онцгой байдлын сайд асан С.Отгонбаяр, хадам аав нь Ерөнхийлөгч асан Х.Баттулга учраас олон нийтийн эчнээ танил. Хувийн намтрын хувьд, 2012 оноос “Оюуны ундраа пропертийз” ХХК-ийн Ерөнхий захирлаар ажиллаж байгаа. “Оюуны ундраа пропертийз” ХХК нь “Zaisan Square” цогцолбор, “Zaisan hill” цогцолбор, “Prime Cineplex” кино театрын төслүүдийг гүйцэтгэсэн. Мөн О.Тэнүүн 2018 оноос Монголын оюутны сагсан бөмбөгийн холбооны Ерөнхийлөгчөөр ажиллаж байгаа. Харин эхнэр Б.Намуун нь аав Х.Баттулгынхаа “Женкотур бюро” ХХК, “Түмэнхишигтэн” ХХК-уудыг удирддаг. Мөн “Намуун хүүхдийн сан”-гийн тэргүүн. 

      О.Тэнүүн өнгөрсөн 2023 оны зун сошиал хаягтаа “Албадлагаар улс төрд орохоор болоо. Би хүсээгүй шүү” гэсэн нь тухайн үедээ шүүмжлэл дагуулж байлаа. Тиймдээ ч хадам аав Х.Баттулга нь түүнийг ирэх сонгуульд Хан-Уул дүүрэгт “албадан” дэвшүүлж байгаа гэх. 

 

XII ТОЙРОГ: ЕРӨНХИЙЛӨГЧ АСНЫ ХҮРГЭН, ГИШҮҮН АСНЫ ДҮҮ БА ХУУЛЬ ЗҮЙН ЭКС САЙД ГОРИЛЖ БАЙНА

 

ЭХ СУРВАЛЖ : ERGELT.MN