Крымыг Оросын бүрэлдэхүүнд оруулан зурсан дэлхийн бөмбөрцөг Беларусьт худалдаанд гарчээ
Москва. Крымыг Оросын бүрэлдэхүүнд оруулан зурсан дэлхийн бөмбөрцөг Беларусийн Могилев хотын их дэлгүүрт зарагдаж эхэллээ гэж сэтгүүлч Евгений Глушков бичсэн байна. “Могилевийн захиргаа, үзэл суртлын алба юугаа хийж байна аа” гэж тэрээр өөрийн фэйсбүүк хуудсанд дургүйцлээ илэрхийлж бичжээ.
Беларусь улс төрийнхөө түвшинд Крымыг ОХУ-ын газар нутаг гэж хүлээн зөвшөөрөөгүй гэдгийг ч сэтгүүлч сануулсан байна.
Янз бүрийн улс орнууд ялангуяа Крымыг Орост нэгтгэснийг хүлээн зөвшөөрдөггүй орнуудад ч энэ хойгийг Оросын газар нутагт оруулсан зураг хэвлэмэл бүтээгдэхүүн худалдаалдаг. Энэ нь Киевийн бухимдалтай хандлагыг өөрчилдөггүй юм. Крымын хойгийг Оросын газар нутаг хэмээн дүрсэлсэн дэлхийн бөмбөрцгийг Францын нэгэн дэлгүүрт зарж байсан бөгөөд "Eyrolles" хэвлэлийн группийн захиалгаар хийсэн аж. Үүнийг худалдаанаас эргүүлэн татуулсан гэж өнгөрсөн нэгдүгээр сард Украины дипломат ажилтан мэдээлж байсан юм.
Дараа нь ийм газрын зураг Чехэд дунд сургуульд хичээлийн хэрэглэгдэхүүн боллоо л гэсэн. Үүнийг Прагын нэгэн сургуулийн хүүхдийн эцэг анх мэдэж нийтэд зарласан. Түүний хэлснээр бол багш нь уучлал гуйсан ч үүнийг Боловсролын яамнаас нь ирүүлсэн гэж тайлбарласан байна. Украины Элчин сайд Евгений Перебийнис үүнийг бүр арваннэгдүгээр сард мэдэж Чехийн эрх баригчдад ханджээ. Улмаар үйлдвэрлэгч нь бүхий л газрын зургаа худалдаанаас эргүүлэн татаж, сургуулиудаас хураажээ.
Крымыг Оросын бүрэлдхүүнд оруулсан газрын зураг, бүтээгдэхүүн хэвлэл мэдээллийн хэрэгслээр, телевизээр ч гарсаар байна. Герман, Австри, Швейцарьт нэвтрүүлгээ цацдаг Германы "Sat" телевизийн “Сибирь бүхэлдээ” гэдэг баримтат кинон дээр ч Крымыг Оросын нутаг гэсэн газрын зураг харуулж байлаа.
Ийм зураг тойрсон дуулиан Украинд өөрт нь ч бас гардаг. Тус улсын СТБ телевиз нь “Гоонь эр” хөтөлбөрөөрөө Украиныг Крымын хойггүй дүрсэлсэн газрын зураг харуулж байлаа. Дараа нь тэд алдаагаа засаж, хөтөлбөрийнхөө найруулагчид хариуцлага тооцсон гэнэ.
2014 оны гуравдугаар сард Крымын оршин суугчдын дунд явуулсан бүх нийтийн санал асуулгаар Бүгд найрамдах улсын болон Севастополийн нийт сонгогчдын 96.77 хувь нь Оростой нэгдэнэ гэсэн санал өгснөөр Крым ОХУ-ын бүрэлдэхүүнд орсон билээ.