“Хятад, Орос улсууд бүхий л чиглэлд амжилттай түншлэлийн хүрээнд, ялангуяа эдийн засгийн чухал чухал механизмуудаар хамтран ажиллах холбоо тогтоосон” гэж тэрбээр хэвлэлийн бага хурал дээр мэдэгджээ. Түүнийхээр бол хамтын ажиллагааны нааштай үр дүн бодитой харагдаж байгаа гэнэ.

“Хоёр орны эдийн засаг бие биенээ нөхөж, талууд харилцан итгэлцлийн хүрээнд хамтран ажиллаж байна. Орос, Хятадын тэргүүнүүдийн удирдлага дор хамтарсан хүчээр АНУ-ын зүгээс хоёр орны дотоод хэрэгт үзүүлж болох бүхий л дарамт, хүндрэлийг даван туулах болно” гэж Фу Зыин тэмдэглэсэн байна.

Дэд сайдын хэлснээр бол хоёр орны хөгжлийг хурдасгах талаар  Москва, Бээжин харилцан ойлголцолд хүрсэн юм байна. Ийм нэгдэл нь ОХУ, БНХАУ-ын ард түмэнд ашигтай гээд цаашид Оростой байнгын харилцаа холбоогоо бэхжүүлнэ гэдэгтээ итгэлтэй байгаагаа илэрхийлжээ.

Хятадаас жилдээ америкт  орж ирдэг 200 тэрбум ам.долларын бараа бүтээгдхүүнд 10 хувийн гаалийн татвар оногдуулах  АНУ-ын хориг  өнгөрсөн даваа гарагаас хүчин төгөлдөр болон хэрэгжиж эхэлсэн юм.

Цагаан ордны мэдээлснээр 2019 оны нэгдүгээр сарын 1-нээс энэ татварыг 25 хувь хүртэл өсгөх юм байна. Хэрэв Бээжин 267 тэрбум ам.долларын бараа үйлчилгээндээ нэмэлт тариф тогтоож хариу арга хэмжээ авахгүй бол энэ хориг хязгаарлалтын гурав дахь шатыг хэрэгжүүлэх болно гэж АНУ-ын ерөнхийлөгч Дональд Трамп бас мэдэгдсэн.

Цагаан ордны тэргүүн үүний өмнө БНХАУ-тай хийж байгаа  худалдааны алдагдал  таалагдахгүй байна гээд америкийн оюуны өмч, технологийг хятадууд хулгай хийж байгаа нь “худалдааны шударга бус үйлдэл” гэж мэдэгдэж байсан юм.

Энэ нь хятадын 50 тэрбум ам.долларын бараа бүтээгдхүүнд 25 хувийн татвар ногдуулах шалтгаан болсон юм. Нэмэгдүүлсэн татвар нь эхлээд 34 тэрбум долларын бараанд долдугаар сарын 6-наас, дараа нь 16 тэрбум долларын бараа бүтээгдхүүнд наймдугаар сарын 23-наас гэсэн хоёр үе шаттайгаар, хэрэгжиж байгаа юм.