Өнгөрсөн жил Сингапурын үндэсний их сургууль нь дэлхийн шилдэг их сургуулийн жагсаалтад Тронтогийн их сургуулийн хамт, 22 дугаар байранд жагсаж байсан. Энэ үзүүлэлтээрээ дэлхийн шилдэг 25 их сургуулийн тоонд багтсан Азийн цор ганц их сургууль болж байсан юм. Үүгээр зогсохгүй Азийн шилдэг их сургуулиар гурван жил дарааллан тодорч байсан билээ.

Тэгвэл энэ жил найман байраар дээшилсэн Цинхуагийн их сургууль Бээжингийн Пэкингийн их сургуулийн рекордыг эвджээ. Ингэснээр Хятадын шилдэг их сургууль болоод зогсохгүй,  Ази тивдээ ч тэргүүлсэн байна. Харин Пэкингийн их сургууль найман байр доошлон 31 дүгээрт жагсжээ.

Цинхуагийн их сургууль ийнхүү найман байраар дээшилсэн нь багшлах орчныг сайжруулсантай холбоотой аж. Харин Пэкингийн их сургууль найман байр доошилсон нь өрсөлдөөнийг нэмэгдүүлж, судалгааны ажлыг бууруулснаас болсон байна.

“Таймс” сэтгүүлийн үнэлгээний редакцын захирал Филл Бати “Энэ жилийн шинэ үзүүлэлт нь Хятадын их сургуулиудын өрсөлдөх чадвар эрс дээшилж байгааг харуулж байна. Хятадын долоон их сургууль шилдэг 200-д багтсан байна. Энэ нь БНХАУ-ын эдийн засгийн гол стратеги нь их сургуулиуд нь болж байгааг харуулж байна” гэж онцолжээ.

Харин Сингапурын үндэсний их сургуулийн захирал Тан Энг Чеэ өөрийн сургуулийг  дэлхийн болон Азийн тэргvvлэх их сургуулиудын дунд нэр хүндтэй хэвээр байна гэдэгт итгэлтэй байгаагаа илэрхийлсэн байна.

Энэхүү жагсаалтыг тухайн сургуулийн багш нарын хийсэн олон улсын хэтийн төлөв, аж үйлдвэрлэлийн хувьсал зэрэгтэй холбоотой судалгааны ажил гэх зэрэг нийт 13 үзүүлэлтийг үндэслэн гаргасан аж.

Харин дараа жилээс энэхүү шалгуураа өөрчлөхөөр төлөвлөж байгаагаа мэдэгдлээ. Тухайлбал их сургуулиудыг үнэлэхдээ, төгсөгчдийн ажлын байрны үзүүлэлт, эдийн засгийн өсөлт, дэлхий нийтийн хамтын ажиллагаа, инновацид оруулсан хувь нэмэр зэрэг хүчин зүйлсийг харгалзан үзэх юм байна.