Орост хүн амины гэмт хэрэг таван жилийн хугацаанд 27 хувь буурчээ
Орост сүүлийн таван жилд аллагын гэмт хэрэг 27 хувь, дээрэм тонуулын халдлага 50 хувь буурсан болохыг ОХУ-ын Дотоод хэргийн сайд Владимир Колоколцев “Аргументы и факты” сонинд өгсөн ярилцлагадаа тэмдэглэсэн байна.
Мөн тэрээр “Сүүлийн жилүүдэд гэмт хэргийн, ялангуяа хүнд гэмт хэргийн тоо буурч байгаа нь ажиглагдаж байна. Өнгөрсөн таван жилд аллагын гэмт хэрэг, дээрэм тонуулын гэмт хэрэг бараг тал хувиар буурлаа. Орон байрны хулгай, машины хулгай ч буурсан байна. Энэ бол улсын хэмжээнд Дотоод хэргийн 895 мянган ажилтан олон нийтийн аюулгүй байдлыг сахин хамгаалахын төлөө ажиллаж байгаатай ч холбоотой” гэдгийг цохон тэмдэглэжээ.
Орос улс 2011 оноос эхлэн сэргийлэхийг цагдаагийн байгууллага болгон өөрчилж бие бүрэлдхүүнийг 500 мянгаар танасан юм. Мэдээж үүнтэй холбоотойгоор янз бүрийн ажил албыг ч өөрчилсөн бөгөөд ялангуяа хүн амтай шууд харьцаж ажилладаг анхан шатны ажилтнууд эрүүгийнхэн, мөрдөн байцаагч нарыг аль болох бага цомхотгохыг эрмэлзсэн байна.
Үүнтэй уялдаад хар тамхи, мансууруулах бодистой тэмцэх ажилд ч тодорхой ахиц гарч байгааг Дотоод хэргийн сайд онцолсон байна. “Хүчтэй үйлчилгээтэй бодис илрүүлэх ажил энэ онд гурав дахин өссөн. Устгасан хар тамхи мансууруулах бодисын лабораторын тоо ч хоёр дахин өслөө” гэж тэрбээр ярьжээ.