Г. Майцэцэг: Би авилга өгөхгүй гэж зоригтой дуугарсныхаа төлөө нухчин даруулсан
Өнөөдөр "Монголд Бид Үйлдвэрлэнэ" ТББ-ын тэргүүн Г.Майцэцэг Эрэл компани болон ЖДҮ-ийн зээлийн асуудлаар хэвлэлийн бага хурал хийлээ. Тэрээр ЖДҮ-ийн зээл эзэндээ хүрч чадахгүй, татвар төлөгчдийн мөнгө хий дэмий зүйлд зарцуулагдаж байгааг сануулан төр, бизнес эрхлэгчдийг дэмжих бус дампууруулж байна гэж үзсэн юм. Өнгөрсөн тавдугаар сарын 27-оос зургаадугаар сарын 10 хүртэл Засгийн Газраас урт хугацааны үйлдвэрлэлийг дэмжих зээлийн төслийг хүлээн авсан билээ. Энэхүү зээлд хамрагдахаар хөдөө орон нутаг болон Улаанбаатар хотоос 2751 иргэн төсөл илгээн нийт 487 тэрбум төгрөгний зээл хүссэн байна.
Г.Майцэцэг хэлэхдээ "Монголд үйлдвэрлэл эрхлэх ямар ч хөрс байхгүй байна. Тэр хөрсийг цэвэрлэж, үр суулгах эрх баригчид үнэхээр дутагдаж байна. Жижиг дунд үйлдвэрлэл бол жижиг асуудал биш. Бизнес эрхэлье, эх орноо хөгжүүлье гэсэн хүн бүрийн төсөл дэмжигддэг байгаасай гэсэндээ би энд ирсэн. Ажлын байр нэмэгдүүлэх, хамгийн том салбар бол жижиг дунд үйлдвэрлэл юм. Үйлдвэрлэл хөгжихийн хэрээр ард түмэн ажлын байртай болж, цалин нэмэгдэн Монголчууд харь оронд боолийн хөдөлмөр эрхлэхгүй. Гэтэл УИХ-ын гишүүд яагаад бизнес эрхлэгчдийг дэмжихгүй, хөгжлийн төлөө хэрүүл хийдэггүй юм бэ" гэсэн юм. Түүнийг "Эксклюзив" брендийн үүсгэн байгуулагч гэдгээр нь хүмүүс сайн мэддэг. "Эксклюзив" компани 2014 онд Чингис бондоос 750 сая төгрөгний зээл авч байсан. Энэхүү зээлд хамрагдсанаар ямар үр дүн гарсан тухай түүнээс асуухад "Чингис бондоос зээл авахаас ч өмнө "Эксклюзив" 3 тэрбум төгрөгний захиалга авчихсан, дэлхийд өрсөлдөхүйц чанартай сөдөн куртка үйлдвэрлэдэг компани байсан. Харин тэрхүү зээлээр хөдөө орон нутагт ажлын байр бий болгож, эх орондоо хувь нэмэр оруулахыг л хүссэн. Гэтэл зээл авсны дараа манай компани нухчин даруулсан. Би албан тушаалтнуудын аясаар хөдлөх хүсэлгүй, авилга өгөхгүй гэдгээ зоригтой хэлснийхээ төлөө компаниа алдсан. Яг үүнтэй адил зүйл "Эрэл" компанид тохиолдох гэж байна. "Эрэл" компаны хөрөнгийг хураах гэж байгаа нь шударга бус явдал. Засгийн газар бизнес эрхлэгчид рүүгээ халдаж байна. Бид шударга бусын өмнөөс бие биенээ өмөөрөх эрхтэй"гэсэн юм.
Мөн тэрээр татвар төлөгчдийн мөнгө шар хайс, нэг жилийн настай гэрэлт гудамж гэх мэт төслүүдэд зарцуулагдаж байгааг дурдан төр бизнес эрхлэгчдийг зөв бодлогоороо дэмжихийг уриалсан юм.