Кан Хосуп: Монгол-Солонгосын шинэ Торгоны зам үүсч байна
Монголд анх удаа "Бүтээлч Ази" хувцас загварын шүүмж хэлэлцүүлэг, эрдэм шинжилгээний хурал зохиогдож буйг тохиолдуулан Монгол дизайнеруудын бүтээл, гадны орнуудын загварын чиг хандлагын талаар сурвалжиллаа.
Энэхүү үйл ажиллагааг Дүрслэх Дизайны Урлагийн Сургууль болон Монгол загвар зохион бүтээгчид хамтран үндэсний үйлдвэрлэлээ дэлхийд сурталчлах, бусад улстай хувцас загвар, бизнесийн чиглэлийн хамтын ажиллагаагаа өргөжүүлж, загварын шүүмж судлалыг хөгжүүлэх зорилготойгоор зохион байгуулж байгаа юм. Мөн есөн орны 101 дизайнеруудын бүтээлийг онцлон нээлттэй үзэсгэлэн зохиож олон нийтэд толилуулж байна.
Хувцас загварын шүүмж хэмээх ойлголт Монголын загварын салбарт хараахан хөгжөөгүй бөгөөд олон нийтийн дунд ч тодорхой ойлголт байдаггүй. Энэ талаар СУИС-ийн Дүрслэх Дизайны багийн тэргүүлэгч Б. Мөнхцэцэг "XXI зуун буюу техник технологийн эрэн зуунд хувцас загварын салбар эрчимтэй хөгжиж байна. Саяхныг хүртэл олон нийтийн дунд цөөн хүн амтай манай оронд олон дизайнер хэрэггүй гэсэн ойлголт түгээмэл байсан. Гэвч бид энэ хандлагаасаа салж дэлхий нийттэй хөл нийлүүлэн алхах цаг нэгэнт болсон. Монголд хувцас загварын шүүмж судлал хөгжөөгүй бүр эхлээгүй гэж хэлж болно. Аливаа зүйл ухаалаг шүүмжтэйгээр илүү хурдан хөгждөг. Олон улсад хувцас загварын шүүмжийг ихэвчлэн энэ чиглэлээр мэргэшсэн сэтгүүлчид, загварын фоточид хийдэг. Манайд яг хувцас загварын чиглэлээр дагнасан сэтгүүлчид байдаггүй. Хэрэв энэ чиглэлээр дагнан нийтлэл нэвтрүүлэг бэлдэх сэтгүүлчид бий болвол илүү хурдан хөгжиж чадна" гэсэн юм.
Монгол загвар зохион бүтээгчдийн бүтээлээс ДДУС-ийн III түвшний оюутан Т. Солонго, Б. Солонго нарын эсгийгээр хийсэн хүрэм сонирхол татсан юм. Тэд хэлэхдээ "Бид бүтээлээ Монголд хамгийн олдоц сайтай байдаг ноосыг таар буюу мааралтай хамт эсгийрүүлж хийсэн. Нөгөө талаар дэлхийд хамгийн их хаягдал үүсгэдэг салбар загварын салбар байдаг. Иймээс байгалийн гаралтай, хөрсөнд хурдан шингэдэг гэдэг утгаар нь эсгийгээр хүрэм хийсэн.
ДДУС-ийн оюутан Б. Солонго, Т.Солонго
Тэдний бүтээл
"Бүтээлч Ази" хэлэлцүүлгийг Солонгос, Хятадын хамтарсан хувцас загвар судлал, үйлдвэрлэлийн академи, Солонгос Улсын Хувцас Загварын Бизнесийн холбоотой хамтран зохион байгуулсан бөгөөд Солонгос дизайнерууд өөрсдийн загвартаа монгол бичгийг элемент болгон урласан байлаа.
Солонгосын Загвар Бизнесийн Холбооны Ерөнхийлөгч Кан Хосуп "Монголын хувцас загварын салбар хурдацтай хөгжих боломтой. Монголчуудад дэлхийд хаана ч байхгүй кашмер байдаг. Хэрэв кашмерыг дизайн, бүтээгдэхүүн загварын хувьд хөгжүүлж чадвал дэлхийн зах зээлд гарах бүрэн боломж байна. Мөн Монгол-Солонгос хоёр улсын түүх торгоны замаар холбогддог бол энэхүү үйл ажиллагаагаар XXI зууны шинэ зам үүсч байна" хэмээсэн юм.
Дэлхийн улс орнууд бүгд өөрсдийн өвөрмөц түүх, ёс заншил уламжлалтай. Эдгээрийн нэгэн илэрхийлэл бол хувцас байдаг. Дэлхийн хувцас загварын томоохон төлөөлөл болсон Азийн есөн орны загвар зохион бүтээгчдийн дунд Монгол залуучууд өөрсдийн чадвараа гайхуулж, бусад орны дизайнеруудаас суралцсан энэхүү арга хэмжээ маргааш мөн үргэлжлэх юм.
Бэлтгэсэн: Х.Үүрийнтуяа, Б.Сарангэрэл