Н.Энхбаяр: Үндсэн Хуулийн нэмэлт өөрчлөлтийг МАН дангаараа хийж болохгүй
УИХ Үндсэн Хуулийн нэмэлт өөрчлөлтийн асуудлыг хэлэлцэж эхэлсэнтэй холбогдуулан Н.Энхбаяр тэргүүтэй МАХН-ын төлөөлөгчид өөрийн байр сууриа илэрхийллээ. Тэд Үндсэн Хуулийн нэмэлт өөрчлөлтөд байгалийн баялаг ард түмний дундын өмч байх ёстой мөн иргэдийн эрүүл мэндийн эмчилгээний төлбөрийг төр засаг хариуцах, төр засгийн бүрэн эрх ард түмэнд байх ёстой гэсэн заалтуудыг Үндсэн Хуулийн нэмэлт өөрчлөлтөд оруулах хэрэгтэй гэж үзэж байгаа юм.
МАХН-ын дарга Н.Энхбаяр "Үндсэн Хуулийн нэмэлт өөрчлөлтийг МАН дангаараа хийж болохгүй. Одоогийн төсөлд хүний эрх, эрх чөлөөг баттай хамгаалах талаар тодорхой санал тусаагүй, Монгол хүний эрх ашгийг бус албан тушаалтнуудын эрх мэдлийн хуваарилалт, тэдний эрх мэдэл үйлчлэх цаг хугацааг уртасгахад чиглэгдсэн шинжтэй заалтууд орсон байна. Бидний дэвшүүлсэн саналыг Үндсэн Хуульд нэмж тусгаснаар гурван сая иргэний эрх ашигт нийцсэн өөрчлөлт хийгдэх болно" гэсэн юм. Мөн тэд хуулийн төсөлд "Дээд боловсролын төлбөрийг төр бүрэн хариуцна" гэсэн заалт оруулахыг шаардсан нь онцлох зүйл байлаа.
Энэ талаар Сүхбаатар дүүргийн намын дарга Д.Дуламсүрэн хэлэхдээ "Олон улсад хүний сурч боловсрох эрхийг заяагдмал эрхийн нэгэн адил үзэх болсон. Харамсалтай нь манай улсад дээд боловсролыг үнэ төлбөртэй болгосноор боловсролоор бизнес хийх зорилготой чанаргүй их дээд сургуулиуд бий болж дипломтой ажилгүйчүүд олширч байна. Нөгөө талаар авъяас чадвар сурах хүсэл эрмэлзэлтэй олон хүүхдүүд төлбөрийн улмаас дээд боловсрол эзэмшиж чадахгүй байна. Эх баригчдын боловсруулсан Үндсэн Хуулийн нэмэлт өөрчлөлтийн төсөлд дээд боловсролын талаар нэг ч үг, өгүүлбэр ороогүй байгаа нь харамсалтай. Төрийн өмчийн бүхий л сургуулиудыг үнэ төлбөргүй болгох заалтыг хуулийн төсөлд оруулах хэрэгтэй" гэсэн юм.
Тэд хэрэв эх баригчид Үндсэн Хуулийн нэмэлт өөрчлөлтийг өөрсдийн эрх ашгийг хамгаалсан, ард түмний эрхийг зөрчсөн хууль болгон хувиргавал үүний эсрэг тууштай тэмцэнэ гэдгээ илэрхийллээ.
