Өчигдөр буюу бямба гарагт хойд хөршийн нийслэлд шударга сонгуулийг шаардан жагссан иргэдээс 1000 гаруй нь баривчлагдсан болохыг Москвагийн цагдаагийн газраас мэдээлжээ. Долоон цаг үргэлжилж, 3500 гаруй хүн цугларсан уг жагсаал нь зөвшөөрөлгүй хийгдсэн тул баривчилгаа явуулсан аж.
"Хотын төв хэсэгт зөвшөөрөлгүйгээр жагсаал цуглаан хийсэн, дэг журмын зөрчил гаргасан үндэслэлээр 1074 иргэнийг баривчилсан" гэж цагдаагийн газар Оросын хэвлэлүүдэд ярьсан байна.
Москвагийн эрх баригчид ирэх 9-р сард болох хотын зөвлөлийн сонгуулиар сөрөг хүчний хэд хэдэн төлөөлөгчдийг нэр дэвшүүлэхгүй шийдвэр гаргасныг эсэргүүцэн иргэд жагсжээ. Сөрөг хүчний нэр дэвшигчид хүсэлт гаргахдаа хуурамч гарын үсэг ашигласан тул сонгуульд оролцуулах боломжгүй гэж эрх баригчид үзсэн аж.
Иргэдийг тэмцэхийг уриалсан гол хүн нь Оросын сөрөг хүчний хамгийн нэр хүндтэй идэвхтэн гишүүн Алексей Навальный байсан аж. Тэрбээр өмнө нь мөн адил зөвшөөрөлгүй жагсаал зохион байгуулсан хэргээр 30 хоног саатуулагдах шийтгэл амсаад байсан юм. Түүнчлэн Навальныйгийн хамтрагчид болох Иван Жданов, Илья Яшин нар уг жагсаалын өмнөхөн саатуулагдсан гэсэн мэдээ байгаа аж.
Москва хотын захирагч Сергей Собянин уг жагсаалыг "аюулгүй байдалд халдаж буй хэрэг" гэсэн бөгөөд хуулийн дагуу дэг журмыг сахиулах болохоо мэдэгдсэн байна.
