Үнэн гэдэг үнэмшмээргүй атлаа гарцаагүй
Үгүйлэгдэж үгүйсгэгддэг мөртлөө туйлын зүйл.
 
Үнэнийг хашгир гэж хэлд хөлд намайг оруулж,
Үсэгт сургаж өндөрт гаргаж өдий зэрэгт хүргэж.
 
Үгийг нууваас сэтгэл хашгирна
Үнэнийг нууваас чулуу хашгирна.
 
Үг эхлээд үүсч Үг нь Үнэн байв
Үнэн Үгээр орчлон тогтож хүмүүн төрөх ч
Түүний эрэлд бүгд мордов
Хананы цаг өглөө оройгүй цохилохыг хэн ч үл анзаарна
Халуун зүрхийг Үнэн өдөр шөнөгүй тогшихыг бүр ч эс хайхарна
Харин Түүнд зүрхээ нээж, сэтгэлээ өгвөөс
Хамаг бие тань Үнэний бунхан болж
Тэнгэрийн хүсэл биелнэ.
 
Үнэн худал хоёр сэтгэлийн төлөө байлдана
Өөр өөрийн болгох гэж насан туршид тэмцэлдэнэ.
 
Үхэр эзнээ өдөртөө таньж өл залгаж өвлийг давдаг болвоос
Үнэнийг хүн насандаа таниваас зол болж зовлонг дэвсэлнэ. 
 

Өнгө мөнгөнд үхмэл сэтгэлээр өөдсөн биеэ үйрэхээс аварна
Үнэний хүчинд омогших итгэлээр улс Монголоо сүйрэхээс аварна.
 
Ухаан биеийн хэсэг Үнэн сэтгэлийн эцэг.
 
Бие ухаанаар, ухаан сэтгэлээр, сэтгэл итгэлээр, итгэл Үгээр
Үг шиг хүчтэн үгүй Үг үгийн дундаас Үнэн Үг бүгдийн Хаан.
 
Өнгө мөнгө минийх бишээ Үнэн үгс Та биднийх.

Гэрэл үгүйд харанхуй оршном
Гэгээрэл үгүйд хорсол оршном
Ухаан үгүйд мулгуу оршном
Ухаарал үгүйд шунал оршном
Амгалан үгүйд айдас оршном
Үнэн үгүйд үхэл оршном.

Өөртөө  зориул гэж өнгө мөнгийг надад хайрлаагүй ээ,
Үнэнийг тунхаглах индэр босго гэж өгөгдсөн юм
Өнчин ядуустай хуваалц гэж тушаагдсан юм
Өр зүрхээрээ үлгэрлэ гэж илгээгдсэн юм.
 
Шунаж бярдаж урвуул гэж эрх мэдлийг танд өгөөгүй ээ,
Шударга ёсыг тогтоох шилбүүр болго хэмээн өгөгдсөн юм
Аархаж таахалз гэж алдар хүндийг надад хайрлаагүй ээ,
Ардын зарц Тэнгэрийн боол бай хэмээн зарлигдсан юм.
 
Арван жил таван тивээр хэрэн тэнэж
Амьдрал дундаас Үнэнийг ухаарсан мөхөс би
Буруутны дунд өнчирч ганцаардавч
Бусдын төлөө өөрийгөө зориулж
Үнэт зүйлсийн үлгэр байж өчнөөн залуусыг
Үнэний замаар өөрийнхөө араас хуйлруулж чадваас
Алаг дэлхийд төрсөн алдхан биеийн амин зорилго биелэх нь тэр..
 
ОУ-ын зэвсгийн шинжээч, хурандаа Доржпаламын Эрдэнэцогт