Солонгосын "Gallup" агентлагийн судалгаагаар Өмнөд Солонгосын Төрийн тэргүүний нэр хүнд хамгийн доод хэмжээндээ хүрч дөнгөж 53 хувьтай болоод байна. Ерөнхийлөгчийн үйл ажиллагаанд төдийлөн итгэхгүй байгаа хүмүүсийн эзлэх хувь 33 болжээ. Мун Жэ Иний нэр хүнд зарим шалгуураар бүр 50 хувиас ч буурсан үзүүлэлт гарсан байна. Түүнийг  жижиг дунд бизнесийн шинэчлэлд өртөгсдийн 44, гэрийн эзэгтэй нарын 46 хувь нь үнэлж байгаа гэнэ.

Ерөнхийлөгчийн сонгуулийн өмнөх амлалт бодит зүйл болж биелэх нь улам л эргэлзээтэй болж  солонгосчууд тэсвэр алдаж эхэлжээ. Ганцхан жилийн өмнө Ерөнхийлөгчийн сонгуулиар түүний төлөө нийт сонгогчдын 84 хувь нь саналаа өгч байсан шүү дээ. Түүнийг дэмжиж байсан энэ олон хүн яагаад түүнээс нүүр буруулав аа?

Гол шалтгаан нь эдийн засаг нийгмийн хүрээний бэрхшээл. Сонгуулийн кампанит ажлын үеэр тэрбээр дөнгөж гурван хувьтай байгаа эдийн засгийн өсөлтийг эргүүлээд өсгөнө гэж амлахдаа нийгмийн хүрээнд, залуучуудын ажилгүйдэл, төрөлт багасаж хүн ам хөгширч байгаа зэргийг шийдвэрлэчихэж чадна гэж найдаж байсан аж.

Түүний шинэчлэлийн нэг нь ажлын долоо хоногийн цагийг богиносгох явдал байлаа. Эхлээд долоо хоногийн ажлын цаг 68 байсныг 52 болгоод одоо үндсэн цаг нь 40 боллоо. Мун Жэ Иний бодлоор бол чөлөөт цаг нэмэгдсэнээр солонгосчууд хувийн амьдралдаа анхаарч, гэр бүлдээ зориулах цаг ихэссэнээр төрөлт ихэснэ гэж тооцоолж. Гэтэл энэ хуулиар ажил олгогчид жилд 11 тэрбум долларын алдагдал хүлээхээр болчихоод байгаа юм. Ажиллагсдын орлого ч буурчээ. Солонгос бол  хөдөлмөрийн хөлсийг цагаар бодож олгодог, нөгөө талаар амралтын өдрийн хөлсийг бүр өндөр тооцдог улс. Ингэхээр хүмүүс амраад байх тутам л орлого нь багасаад байгаа хэрэг.

Үүнээс үүдээд эрх баригчид алдаагаа залруулах гэж нэг цагийн ажлын хөлсийг 16 хувь нэмэгдүүлэх шийдвэр гаргасан. Үүнээс болоод өнөө хүртэл ёстой л орлого зарлагын хооронд амьдарч ирсэн  жижиг дунд бизнес эрхлэгчид дампуурахад хүрч хаалгаа барьсан юм. Арай гэж үлдсэн зарим нь ажиллагсдынхаа тоог 16 хувиар цөөлж байж тэсэж үлдлээ. Ингээд л мянга мянган хүн ажилгүй болон гудамжинд гарч, шинэчлэлийн өмнөх байдалд эргээд орох нь тэр.

Мун Жэ Ин сонгуулийн өмнө төрийн өмчийн салбарт  бараг нэг сая ажлын байр шинээр бий болгож,  эрүүл мэндийн салбарт шинэчлэл хийнэ гэж амлаж байсан. Гэтэл энэ амлалт бас л биелээгүй байна. Сөрөг хүчнийхний хэлж байгаагаар бол үүнийг хэрэгжүүлэхэд 160 тэрбум доллар хэрэгтэй ч энэ хөрөнгийг хаанаас олох эх үүсвэр нь тодорхойгүй байгаа гэнэ.

Ард түмэнд болоод байгаль орчинд хортой цөмийн эрчим хүчнээс татгалзах Ерөнхийлөгчийн амлалт  бас л биелээгүй байна. Цөмийн эрчим хүчний хэд хэдэн станцыг хаачихвал улс орон эрчим хүчээр гачигдах гээд, нөгөө талаар нүүрсээ түлж эхлэх юм бол агаарын бохирдол бүр ихсэх аюул хүлээж буй...

Умард Солонгосын асуудал ч гэсэн Мун Жэ Иний нэр хүнд унах шалтгааны нэг болсоор байна. Трамп, Ким Жон Ун хоёрыг өнгөрсөн зун Сингапурт уулзсан явдлыг өмнөд солонгосчуудын олонх нь маш их талархаж хүлээж авсан. Умард Солонгос цөмийн зэвсгээсээ татгалзаад, Өмнөдтэй болон АНУ-тай харилцаа сайжирвал хоёр Солонгос нэгдэх асуудал тун ойрхон байна гэцгээж байсан.

Гэтэл Мун Жэ Иний амлалт бас л тийм амархан биелэхгүй нь харагдлаа. Умард Солонгос ч өмнөдийнхний бодож байгаа шиг тийм амархан бууж өгч цөмийн зэвсгээсээ хурдан татгалзахгүй нь бололтой.

Одоо Мун Жэ Иний засаг захиргаа хоёр Солонгосын гурав дахь дээд хэмжээний уулзалтыг есдүгээр сарын 18-20-нд Пхеньянд  хийхээр зарлаад байна. Магадгүй Мун Жэ Ин энэ уулзалтаар алдагдсан нэр хүндээ эргүүлж олж авахыг тооцоолж байгаа ч өмнөх 84 хувьдаа хүрнэ гэдэг юу л бол....