Венесуэлийн Ерөнхийлөгчийг унагаах төлөвлөгөөг АНУ судалж байна
Америкийн засаг захиргааны ажилтнууд Венесуэлийн цэрэг армийнхантай холбогдож Засгийн газрыг нь унагаах төлөвлөгөө гаргахаар судалж байна гэж "The Independent" мэдээлж байна.
Америкийн албаныхан бүр 2017 оны намраас ийм санал бодолтой хүмүүстэй хэд хэдэн удаа уулзаж ярилцжээ. Венесуэлийн эдийн засаг маш хурдтайгаар унаж байгаатай холбогдуулан хамгийн багаар бодоход тэндхийн гурван ч бүлэглэл засгийн эрхийг хүчээр гартаа авахаар төлөвлөж байгаа юм байна. Үүнээс үүдээд АНУ-ын Ерөнхийлөгч Дональд Трамп энэ ажиллагаанд оролцох боломжийн талаар зөвлөхүүдтэйгээ ярилцсан байна.
Үр дүнд нь босогчдын нэг бүлэглэлийнхэн Цагаан ордонтой холбоо тогтоохоор Европын нэг улсад байгаа Элчин сайдын яам руу дипломатаа илгээжээ. Тэр нь гурван ч удаа уулзаж ярилцсан ч эцсийн шийдэлд хүрсэн хэлэлцээр болсонгүй. Эцсийн эцэст Вашингтон ийм ажиллагаанд оролцож, ингэхийг санаархаж байгаа хүчнийг дэмжиж, эд материалын тусламж үзүүлэхгүй гэж шийдсэн байна. Харин венесуэлчүүд өөрсдөө төрийн эргэлт гаргахаар гурван ч удаа оролдсон боловч амжилтанд хүрсэнгүй.
Нийслэл Каракаст нисгэгчгүй аппаратад байрлуулсан тэсрэх бодисоор өөрийг нь алах гэсэн оролдлого гарсан тухай Венесуэлийн Ерөнхийлөгч Николас Маударо наймдугаар сарын 4-нд нийтэд зарласан юм. Үүнийг зохион байгуулагч нь “Хилэнт цэргүүд” гэдэг бүлэглэлийнхэн байсан гэнэ.
Мадуро бас Колумбын Ерөнхийлөгч, Нобелийн шагналт Мануэл Сантосын амь насанд халдахаар зэхэж байсан хэмээн энэ хэрэгт сэжиглэж нэг хурандаа, бас нэг генералыг баривчилсан гэжээ.