2016 оны АНУ-ын ерөнхийлөгчийн сонгуульд Орос хөндлөнгөөс оролцсон хэмээн  мөрдөн шалгаж байсан баримт бичгийн заримыг нууцаас гаргаж дэлгэхийг АНУ-ын Ерөнхийлөгч Дональд Трамп америкийн Хуульзүйн яам, Холбооны мөрдөх товчоо, Үндэсний тагнуулын газрын захиралд даалгалаа гэж Цагаан ордон даваа гарагт тараасан хэвлэлийн мэдээндээ дурджээ.

Баримт бичигт “оросыг мөрдөн шалгаж байсан бүхий л бичмэл материалыг хянаж нягтлахгүйгээр дэлгэх болно” гээд Холбооны мөрдөх товчооны дарга асан Жеймс Коми, түүний орлогч Эндрю Маккейб, туршуул байсан Питер Стржок, түүний хамтрагч Лиза Пейж, Хуульзүйн яамны өндөр тушаалын ажилтан байсан Брюс Ор нарыг дурджээ.

Энд “АНУ-ын конгрессын хэд хэдэн хорооны асуулга, мөн мөрдөн шалгах ажиллагааны ил тод байдлыг хангах тухай” хэсгийг нууцаас гаргах ёстой гэсэн байна. Үүний зэрэгцээ “Гадаадын тагнуулыг ажиглах тухай хууль”-ийн хүрээнд хуудас 10-12, 17-34, Холбооны мөрдөх товчооны бүхий л тайлан, оросуудыг мөрдөн шалгаж байгаа талаарх Брюс Ортой хийсэн ярилцлага, сонгуулийн штабын зөвлөх асан Картер Пейжийг тандаж байсан зэргийг дэлгэж болно гэжээ.

АНУ-ын конгрессын бүгд найрамдах намаас сонгогдсон 12 гишүүн Ерөнхийлөгч Дональд Трампад хандаж АНУ-ын ерөнхийлөгчийн 2016 оны сонгуульд оросууд нөлөөлж оролцсон хэмээн мөрдөн шалгаж байсан Холбооны мөрдөх товчооны материалуудыг нууцаас гарахыг есдүгээр сарын 7-нд хүссэн юм байна. Хууль тогтоогчид 2016 оны сонгуулийн өмнө Трампын сонгуулийн штаб Оросын эрх баригчидтай яриа хэлэлцээ хийсэн гэдгийг батлах гэсэн материалыг “Маш нууц” гэсэн ангиллаас гаргаж дэлгэх нь зүйтэй гэжээ. Энд бас  Трампын сонгуулийн штабын зөвлөхөөр ажилласан Картер Пейжийг Холбооны мөрдөх товчоон нууцаар тандаж байсан тухай  2016 оны аравдугаар сараар огноолсон материалыг ч дурджээ.  

Холбооны мөрдөх товчооны ажилтны баталснаар бол Пейж “Оросын албаны хүмүүс, ялангуяа оросын тагнуулын офицеруудтай харилцаа тогтоосон”, “Оросын эрх баригчидтай яриа хийж байсан” гэнэ.  Харин Холбооны мөрдөх товчоо британийн тусгай албаны туршуул байсан Кристофер Стилийн гаргасан ямар ч баталгаагүй мэдээллээр Пейжийг тандах зөвшөөрөл авсан юм байна.

Дональд Трамп 2016 оны сонгуулийн өмнөх кампанид ОХУ хөндлөнгөөс нөлөөлсөн хэмээн ямар ч үндэслэлгүй мөрдөн шалгаж байна гэж Холбооны мөрдөх товчоо, Хууль зүйн яамны ажилтнуудыг нэг бус удаа буруутгаж байсан юм. Үүний зэрэгцээ тэрбээр оросын албаны хүмүүстэй ямар нэг холбоо тогтоосон гэсэн сэжиглэлийг удаа дараа няцааж байсан. Цагаан ордны тэргүүн үүнийг “Шулам агнах гэсэн улс төрийн ав” гэж нэрлэж байлаа. АНУ-ын сонгуульд хөндлөнгөөс нөлөөлсөн гэсэн буруутгалыг Москва ч бас нэг бус удаа няцааж байсан юм.