Зоригтой, хүчтэй хүнийг тодорхойлох олон зан чанар байдаг. Ихэнхидээ энэ нь үнэнч шударга байдал,хариуцлагатай байдал, өөрийгөө хянах чадвартай холбоотой. Харин та өөрийгөө сул зантай, хүчтэй биш гэж бодож байгаа бол дараах аргыг хэрэгжүүлээрэй. Энэ нь таныг хүчтэй нэгэн болоход туслах болно.
1.Өөрийн сайн талыг хөгжүүл
-Үнэнч, шударга бай
Үг үйлдэл хоёр зөрсөн зүйл битгий хий. Хуурамч сэтгэл хөдлөлийг бүү илэрхийл. Хүмүүс ихэнхи тохиолдолд хуурамч байдлыг маш амархан мэддэг. Жишээлбэл: Хэрвээ та хосоо удаан ажиллаж, танд цаг гаргахгүй байгаад уурлаж байвал: “Намайг уурлаж, чамайг дэмжихгүй байгаад уучлаарай. Гэхдээ энэ бүхэн чамайг санаж байгаатай холбоотой болов уу” гэж үнэнийг хэлэх зоригтой байгаарай.
-Өөрийгөө ойлгож сурах
Өөрийгөө ойлгож сурах нь өөрийнхөө дотор байгаа зүйлийг илүү сайн мэдэхэд тустай. Өдөрт цөөн минутыг “Би энэ үгийг яагаад энэ байдлаар хүлээж авсан юм бол?” “Дахин хэрүүл гарахгүй нь тулд би ирээдүйд юу хийх хэрэгтэй вэ” гэх мэт бодох хугацааг өөртөө гаргаарай.
Үүнээс гадна бясалгал хийх нь өөрийгөө ойлгоход нэн тустай. Орчин үед энэ талаар маш олон ном, аппликейшн, хичээлүүд бий.
-Өөрийгөө хянаж сурах
Өөрийгөө хянаж сурахад өдөр бүрийн энгийн зүйлээс эхлэхэд л хангалттай. Жишээлбэл: Хоол хэтрүүлэн хэрэглэхгүй байх. Та шөнө хоол идэхийнхээ өмнө үнэхээр үүнийг хүсэж байна уу, үнэхээр өлсөж байна уу гэдгээ бодоод үзээрэй. Дараа нь нэг аяг цэвэр ус уу. Санаатайгаар өдөр тутмын амьдралдаа өөрчлөлт оруулж, өглөөгүүр ороо хурааж занш. Энэ нь танд өөрийгөө хянахад туслаж, та ирээдүйд энэ зан чанараа өөр зүйлд ашиглах боломжтой.
-Өөрийн үзэл баримтлалд үнэнч бай
Таны үйлдэл таны үзэл бодолтой нийлэхгүй байвал үргэлж тухгүй мэдрэмж төрөх болно. Өөрийнхөө үнэ цэнэ, үзэл баримтлалыг үнэлэж, үнэнч байгаарай. Хэн нэгний дарамт шахалтаар шийдвэр гаргах хэрэггүй.
Өөрийн шийдвэрийг үзэл бодолтойгоо нийцүүлж гаргаж байгаарай.
-Өөрийн хийсэн алдаанд хариуцлага хүлээж, засаж байгаарай
Хүн бүр алдаа гаргадаг бөгөөд алдаагаа хэрхэн хүлээн авч байгаа нь таны зан чанарыг тодорхойлдог. Алдаагаа хүлээн зөвшөөрч байвал та хүчтэй нэгэн юм. Өөрийн хийсэн буруу зүйлээс болж уучлалт гуйхаас бүү санаа зов. “Чиний санааг өөрийн болгож ашигласанд уучлаарай” гэж хэлэх нь та өөрийгөө хүчтэй болохыг батлаж буй илрэл юм.
-Тэвчээртэй бай
Зарим тохиолдолд таны уур бухимдал хүрэх нь энгийн үзэгдэл. Гэхдээ тэвчээрийг дасгалжуулах хэрэгтэй. Жишээлбэл: Таны хамтрагч ямар нэг мэдээллийг таны хүссэн хэмжээнд хурдан ойлгож чадахгүй байна уу? Магадгүй та түүнд хангалттай сайн тайлбарлаж чадахгүй байгаа юм болов уу? Эсвэл та мэргэжлийн үг хэллэг хэтрүүлэн хэрэглэж байгаа юм болов уу? гэх мэт асуултуудыг өөрөөсөө асууж, яаруу хариу бүү хийгээрэй.
-Үнэнчээр өөрийгөө дүгнүүлээрэй
Заримдаа өөрийгөө үнэнчээр дүгнэх хэцүү байдаг. Хэрвээ та үнэхээр өөрийн зан аашийг өөрчлөхийг хүсэж байвал өөрийнхөө итгэдэг хүндээ хандаж, өөрийгөө үнэнчээр дүгнүүлээрэй. Өөрийн сайн болон сул талыг асууж, өөрийгөө засах нь зүйтэй.
2. Талархаж сур
-Өөрийгөө бусад хүмүүсийн оронд тавь
Бусад хүмүүсийг ойлгодог байх нь хүчтэй зан чанарын нэгэн илрэл юм. Бусад хүмүүсийн мэдрэмжийг мэдрэх гээд үзээрэй. Магадгүй таны найз дотны хүнээ алдаад, ууртай, мэдрэмтгий болчихсон юм болов уу. Өөрийгөө түүний оронд тавиад үзэх нь зүйтэй. Танд ямар мэдрэмж төрж байна. Энэ үед та түүнд шүүмж биш харин сэтгэл санааны дэмжлэг хэрэгтэй гэдгийг ойлгоорой.
-Худал ойлголтуудыг үгүйсгэж сур
Ер нь хүмүүс нэг зүйл сонсчихсон л бол бусдын амаар явж итгэсэн байдаг. Жишээлбэл: Боловсролгүй хүмүүс амжилтгүй, ухаалаг бус байдаг гэдэг яриа бий. Тэгвэл эргэн тойрноо ажиглаад нэг үзээрэй. Энэ ойлголтыг худал болохыг батласан олон батлагаа бий шүү.
-Талархал илэрхийлж сурах
Талархал илэрхийлж сурах нь өөрийгөө болон бусдыг хүлээж авахад нэн тустай алхмын нэг юм. Талархлыг өдөр бүр илэрхийлж сурснаар та ааш зан тань хэрхэн өөрчлөгдөж байгааг харах болно. Орой бүр унтахынхаа өмнө талархдаг гурван зүйлийнхээ талаар бод.
Үүнээс гадна талархал хүлээж буй хүмүүстээ баярлалаа гэж хэлж байгаарай. Бусдад талархал илэрхийлэх нь таныг хүчтэй болохыг батлаж байна.
3.Удирдагчийн чанарыг гаргаж сур
-Өөрийн үзэл бодлыг илэрхийлж, бусдыг ярих боломжийг олго
Ичимхий байдалтайгаа тэмцэхэд нэлээд хүч хөдөлмөр зарцуулах хэдий ч хүн бүр таны дуу хоолойг сонсох хэрэгтэй. Ажлынхаа хуралд оролцож, өөрийн үзэл бодлыг чөлөөтэй, ойлгомжтой илэрхийлэх шаардлагатай. Энэ тохиолдолд бусад хүмүүс таныг сонсож эхлэнэ.
Хэрвээ та ичимхий биш бол магадгүй хэн нэгэнд ярих боломжийг олгодоггүй байж болох юм. Тиймээс тэвчээртэй байж бусдад ярих боломжийг олгоорой.
-Шинийг илэрхийлэх сонирхолтой байх
Шинэ зүйлийг сурах бүртээ та өөрийгөө нээж байдаг. Үүнийг өдөр тутмын амьдралдаа хэрэгжүүлэхээс бүү санаа зов. Жишээлбэл: “Би санхүүгийнхний гаргаж буй төслийн талаар илүү ихийг мэдэхийг хүсэж байна. Би энэ уулзалтанд оролцох боломжтой юу?” гэж даргадаа хэлж болно.
-Тусламж гуйхаас бүү санаа зов
Зарим хүмүүс тусламж гуйхыг сул дорой байдлыг илэрхийлдэг гэж боддог. Үнэн хэрэгтээ энэ бол та өөрийгөө байгаа чигээр нь хүлээн зөвшөөрч буй ойлголт юм. Таны хүсэлт тодорхой байх хэрэгтэй. “Чи гэртээ юу ч хийхгүй байна” гэж хэлэхийн оронд “Чи өнөөдөр хувцсаа угаагаад, гэрээ цэвэрлэчихвэл их зүгээр юм” гэж хэлж болно.
-Бусдын давуу талыг харж сур
Сайн удирдагчид бусдын давуу талыг харж, магтан сайшаах нь илүү үр дүнтэй болохыг ойлгодог. Бусдад өөрийн давуу талыг хөгжүүлэх боломжийг олгож, энэ давуу талыг хөгжүүлэхэд багаар хамтарч ажиллаарай. Жишээлбэл: “Чи үнэхээр сайн илтгэл тавьж байна шүү. Өөрийнхөө хэлтсийг төлөөлж илтгэл тавихыг хүсэж байна уу” гэж асууж болно.
Хэлтсийнхээ гаргасан амжилтанд баярла. Ажилдаа "би" гэсэн үүднээс биш харин “бид” гэсэн байдлаар хандаарай.
-Хүндрэлийг даван туулах хэрэгтэй
Асуудал хүндрэлийг тоохгүй өнгөрөөхийн оронд асуудлыг шийдвэрлэх боломжийг ашиглаарай. Асуудлыг бодитоор хүлээн авч, хэт их сэтгэл хөдлөлийг илэрхийлэх хэрэггүй. Жишээлбэл: Та нэг хэлтсийг удирдаж байтал ажилтан тань урьдчилан мэдэгдэхгүйгээр ажлаасаа халагдах өргөдлөө өгсөн байна. Энэ тохиолдолд та уурлах хэрэггүй. Харин үүний оронд нөхцөл байдлыг хэрхэн даван туулах талаар бодож, багийнхантайгаа хамтарч ажиллаарай.
