Саяхан Ирландын тамирчин Конор Макгрегорыг ялж холимог тулааны хөнгөн жингийн аваргын цолоо хамгаалсан Хабиб Нурмагомедов бас нэгэн ялагдашгүй аварга гэгдэх мэргэжлийн боксын тамирчин Флойд Мэйуидер/Floyd Mayweather/-ийг дараагийн томоохон өрсөлдөгчөөрөө сонгожээ. Алдарт боксчны хувьд Хабибын саналыг нааштайгаар хүлээж авсан байна.
Босоо аварга Мэйуидерийн сурталчилгааны байгууллагын захирал Леонард Эллербе/Leonard Ellerbe/ өөрийн инстаграм хуудсандаа орос тулаанчтай хамт байгаа бичлэгээ оруулжээ. Тус бичлэг дээр Хабиб Нурмагомедов Флойд Мэйуидерийг тулаанд дуудаж "Алив ээ Флойд, одоо л бид тулалдах ёстой. 50-0 бас 27-0, огт ялагдаж үзээгүй хоёр залуу байна. Гэхдээ ширэнгэд ганц л хаан байх ёстой" гэж хэлсэн байна. Харин Мэйуидер даваа гарагт өөрийн инстаграм дээрээ "CBS, Showtime, MGM Grand мөнгөө бэлдэцгээ. Лас Вегасыг дахиад агуу болгоё!" гэж бичин хариултыг нь өгчээ.
Флойд Мэйуидерийн хувьд мэргэжлийн боксын рингэн дээр 50 тулаан хийснээс ганц ч ялагдаагүй юм. Тэрээр мөн өнгөрсөн оны наймдугаар сард Конор Макгрегортой тулалдаж ялалт байгуулж байсан юм. Нурмагомедов болон Мэйуидер нарын тулаан мэргэжлийн бокс болон холимог тулааны аль дүрмээр нь явагдах эсэх нь одоохондоо тодорхой бус байна.