Өнөөдөр БНСУ даяар орон нутгийн цагаар 08:40-с эхлэн хагас сая гаруй сурагчид өөрсдийн суралцсан 12 жилийнхээ турш бэлдсэн чухал шалгалтаа өгцгөөж байна.
Манайхаар ЭЕШ-тай дүйх Солонгосын "CSAT" буюу Коллежийн эрдмийн шалгалт /хүмүүсийн товчилж дуудаж заншсанаар "Сун Ён"/ нь найман цагийн турш тасралтгүй үргэлжилдэг бөгөөд сурагчдын ямар их сургуульд орохыг шийдээд зогсохгүй ямар ажилд орох, хэр хэмжээний орлоготой байх, хаана амьдрах, тэр ч байтугай ямар хүмүүстэй холбоо харилцаатай байхыг нь тогтоож өгдөг байна.
Жил бүрийн арван нэгдүгээр сард "Сун Ён" шалгалт Өмнөд Солонгосыг улс даяар нь зогсонги байдалд оруулдаг.
Сөүл хотод гэхэд л дэлгүүрүүд, банкнууд үүдээ барьж, хөрөнгийн бирж ч гэсэн үйл ажиллагаандаа оройтож ордог байна. Түүнчлэн барилгын ажлууд зогсож, онгоцнууд нислэгээ саатуулж, цэргийн ангиуд бэлтгэл сургуулилтаа завсарлана.
Хот даяарх энэ анир чимээгүй байдлыг хааяахан шалгалтаасаа хоцорсон сурагчдыг хүргэж өгөх цагдаагийн мотоциклын дуут дохио л эвдэх аж. Түгшсэн эцэг эхчүүд ойролцоох Буддын хийд эсвэл Христийн сүмд цугларч хүүхдүүдийнхээ зургийг барин залбирцгаадаг байна.
Энэ жил 18 настай Ко Ён Согийн хувьд анхны "Сун Ён"-доо орох гэж байна.
"Бидний хувьд Сун-Ён бол цаашдын ирээдүйн үүд юм. Энэ ганц өдөрт зориулж бид 12 жил бэлдсэн. Манай улсад их сургуульд элсэнэ гэдэг маш чухал. Энэ шалгалтыг таван ч удаа өгсөн хэд хэдэн хүнийг би мэдэх юм байна"
Ко Ён Со (Төгсөх ангийн сурагч)Шалгалт авах байрны гадна сурагчид дуулж, уриа хашхирч, нэг нэгэндээ амжилт хүсэж ихэд цоглог байцгаах ч дотогшоо орсны дараа нам гүм байдал ноёлж уур амьсгал тэр чигтээ өөрчлөгддөг байна. Танхим руу оруулахын өмнө металл илрүүлэгч барьсан шалгагчид тэднийг зогсоож гар утас, бугуйн цаг, цүнх гээд бүхий л эд зүйлсийг нь хураан авдаг.
Жил бүрийн есдүгээр сард Өмнөд Солонгосын нутаг бүрээс 500 багшийг шалгаруулж Ганвон мужийн уулархаг бүс дэх нууц байранд авчран шалгалтын асуултуудыг бэлдүүлдэг байна. Сарын турш тэд ямар ч утас ашиглахгүй, гаднах ертөнцөөс бүрэн тусгаарлагдсан байдалтай байдаг аж.
БНСУ нь боловсролтой иргэдийнхээ тоогоор дэлхийд тэргүүлдэг улсуудын нэг юм. Тиймдээ ч ажилгүй иргэдийнх нь гуравны нэг нь хүртэл дээд боловсролтой иргэд байдаг. Харин тус оронд ажилгүйдлийн түвшин сүүлийн арваад жилд байгаагүй дээд түвшинд хүрсэнтэй зэрэгцэн их сургуульд элсэх шалгуур улам л чангарсан ажээ.
Харин сурагчид Солонгосын Харвард гэж хэлж болохоор "Сөүлийн үндэсний их сургууль", "Корё их сургууль", "Ионсей их сургууль" гэсэн гурван тэргүүлэгч их сургуульд тэнцэхийн тулд бүх чадлаа дайчилдаг байна. Гэхдээ нийт шалгалтанд орогсдын 70 хувь нь ямар нэгэн их сургуульд элсэж чаддагаас тэдгээрийн ердөө 2 хувь нь л дээрх гурван их сургуульд ордог байна.