Дээд боловсрол, карьер төлөвлөлтийн бүхий л мэдээллийг багтаадаг "QS" сүлжээ дэлхийн шилдэг их сургуулиудын 2019 оны жагсаалтаа саяхан гаргажээ. Энэ онд АНУ-ын Массачусетсийн технологийн институт дэлхийн хамгийн шилдэг их сургуулиар тодорсон бол мөн адил америкийн Стэнфорд, Харвард их сургуулиуд удаалсан байна. Академик стандарт, PhD зэрэгтэй багш нарын тоо, гадаад дотоодод солилцоогоор явуулах оюутнуудын тоо гэх мэт маш олон үзүүлэлтийг дундачлах аргаар оноо өгдөг энэхүү жагсаалтад энэ жил Ази тивээс нийт 505 их сургууль багтжээ. Ингээд та бүхэнд "QS Top Universities" жагсаалтад хамгийн өндөр оноо авсан Азийн шилдэг 10 их сургуулийг танилцуулж байна.
10 Сөүлийн их сургууль (Seoul National University)
1946 онд байгуулагдсан Сөүлийн их сургууль нь Өмнөд Солонгосын боловсролын тэргүүлэх байгууллагуудын нэг юм. Академик боловсролын чанар, төгсөгчдийн ажлын байртай болох хувиараа тус жагсаалтад тэргүүлэгчдийн дунд орж байна.
БНСУ-ын Ерөнхийлөгч асан Ким Юн Сам тэргүүтэй улс төр, урлаг соёлын нөлөө бүхий олон хүмүүс тус их сургуулийг төгссөн байдаг.
9 Хонконгийн Хятад их сургууль (The Chinese University of Hong Kong)
1963 онд буюу харьцангуй хожуу байгуулагдсан Хонконгийн Хятад их сургууль нь тус жагсаалт дээр Азид 9-р байранд, дэлхийд 49-р байранд бичигдэж байна.
Академик болон нийгмийн хүрээнд өндөр стандарт тавин ажилладаг тус их сургууль нь олон улсын факультет, ялангуяа гадаад оюутнуудад ээлтэй байдлын шалгуурт маш өндөр оноо авчээ.
8 Солонгосын шинжлэх ухаан, технологийн дээд институт (KAIST)
Судалгаанд чиглэсэн Өмнөд Солонгосын анхны институт болон 1971 онд байгуулагдаж байсан KAIST нь энэ жагсаалтад Ази тивд 8-р байранд, дэлхийд 40-р байранд бичигдэж байна.
Тус институт нь PhD зэрэгтэй багш нарын тоогоор болон факультет тус бүрд оногдох эрдэм шинжилгээний ажлынхаа тоогоор дэлхийд дээгүүр бичигдсэн байна.
7 Хонконгийн шинжлэх ухаан, технологийн их сургууль (HKUST)
1991 онд байгуулагдаж байсан Хонконгийн ШУТИС нь үйл ажиллагаа явуулсан богинохон хугацаандаа амжилт бүтээлээр дүүрэн байж өдгөө дэлхийн шилдэг их сургуулиудын жагсаалтад 37-р байранд бичигдэж байна. Боловсрол, эрдэм шинжилгээний маш өндөр стандарттай энэхүү их сургууль нь нийт судалгааны ажлын тоо, олон улсын факультетууд, гадаад оюутнууд болон солилцооны оюутнуудад ээлтэй байдал зэрэг олон шалгуураар дэлхийд дээгүүрт бичигджээ.
6 Фудань их сургууль (Fudan University)
Шанхай хотод төвтэй Фудань их сургууль нь өмнөд хөршийн хамгийн нэр хүндтэй шилмэл их сургуулиудын нэгт тооцогддог. 1905 онд буюу Манж Чин улс унахын өмнөхөн байгуулагдаж байжээ.
Фудань их сургууль нь эрдэм шинжилгээний ажлын тоо, судалгааны ажлыг дэмжих нөхцөл сайтайгаараа уг жагсаалтыг тэргүүлэгчдийн эгнээнд бичигджээ.
5 Бээжингийн их сургууль (Peking University)
1898 онд хуучин Чин гүрний эзэн хааны коллежийн суурин дээр байгуулагдсан Бээжингийн их сургууль нь өмнөд хөршийн анхны дээд боловсролын байгууллага юм. Дээд мэргэжилтнүүдийг бэлтгэсэн зуугаад жилийн хугацаандаа энэхүү их сургууль нь Хятадын соёлын довтолгоон, 1989 оны Тиан Ан Мений талбайн эсэргүүцлийн арга хэмжээ зэрэг түүхийн томоохон үйл явдлуудад голлох үүрэгтэй оролцжээ.
Бээжингийн их сургууль төгсөгчдийн ажил олох чадвар, академик боловсролын чанараар дэлхийн шилдэг их сургуулиулын жагсаалтад 30-р байранд, Азидаа эхний тавд багтсан байна.
4 Цинхуа их сургууль (Tsinghua University)
Бээжинд байрлах Цинхуа их сургууль нь инженерчлэл, мэдээллийн технологийн хөтөлбөрийн чанараар дэлхийд дээгүүр бичигддэг.
Уг жагсаалтын академик хүрээний ихэнх шалгуурт Цинхуа их сургууль маш өндөр оноо авч, дэлхийд 17-д бичигджээ.
3 Наняний технологийн их сургууль (Nanyang Technological University)
Сингапур дахь Наняний их сургууль нь судалгаа голлосон дэлхийн шилдэг их сургуулиудын нэг болохын зэрэгцээ "QS"-ийн дэлхийн шилдэг залуу их сургуулиар 4 дэх жилдээ дараалан тодорсон байна.
Эрдэм шинжилгээний ажлын тоо, олон улс дахь судалгаа шинжилгээний сүлжээ, гадаад оюутнууд, солилцооны оюутнуудад ээлтэй байдал зэрэг олон шалгуурт маш өндөр оноог авчээ.
2 Хонконгийн их сургууль (University of Hong Kong)
100 гаруй жилийн түүхтэй энэхүү их сургууль нь Хонконгийн бүс нутаг дахь хамгийн анхны дээд боловсролын байгууллага юм. Судалгаа төвтэй дэлхийн шилдэг их сургуулиудын нэг. Мэргэжлийн 6 хөтөлбөр нь тус тусын салбартаа дэлхийн топ 10-т бичигддэгээс шүдний эмчийн хөтөлбөр нь гурав дахь жилдээ дараалан дэлхийд тэргүүлж байна.
1 Сингапур улсын их сургууль (National University of Singapore)
Энэ оны Азийн шилдэг их сургуулиар Сингапур улсын их сургууль (дэлхийд 11-т) тодорч байна. Урлагийн салбараас эхлээд инженерчлэл хүртэл мэргэжлийн маш олон хөтөлбөртэй, гурван кампус, 17 факультеттэй, дэлхийн 100-д орны 38 мянган оюутныг сургадаг энэхүү их сургууль нь сургалт, судалгааны тал дээр олон улсын стандартыг ази хэв маягийн мэргэшил, алсын хараатай хослуулж үйл ажиллагаа явуулдгаараа алдартай.