Хүүхдээ уулчин болгох уу, эсвэл уулын гутал авч өгөөд ажиглаж суух уу?
9 сарын 1 боллоо. Эцэг, эхчүүд юуг анхаарах ёстой вэ?
Юуны өмнө хувийн ч бай, улсын ч бай сургуульд хүүхдээ өгсөн тул, таны хүүхдээ боловсролтой болгох үүрэг дууслаа, боллоо гэсэн туйлын залхуу, мэдээж худлаа гэдгийг нь мэдэж байгаа бодлоосоо татгалзах.
Хүн амжилтанд хүрэхийн тулд түүнд багаж, хэрэгсэл хэрэгтэй. Яг доорх уулчинд хальтирахгүй гутал, хоол хүнс, дулаахан хувцас, малгай хэрэгтэйн адилаар таны хүүхдэд элдэв багаж хэрэгсэл хэрэгтэй.
Сургуульд юу заадаг вэ. Сургуульд тоо, түүх, хэл, уран зохиол заадаг. Эд бол багаж хэрэгсэл юм. Эд бол хүнд хэрэгтэй ч байж болох, хэрэглэхгүй ч байж болох (эцэг эхчүүд та нарын хэд нь хамгийн сүүлд пифагорын теорем ашиглаж гурвалжингийн талбай олсон бэ) хэрэгслүүд билээ.
Харин сургуульд юу зааж чадахгүй байна вэ.
Уулчин хүнд гутал, малгай байх төдийгээр хүнд аялалыг давж уулын оргилд хүрч чадах билүү. Мэдээж үгүй.
Уулчин хүнд зорилго байх ёстой. Уулчин хүнд тэвчээр байх ёстой. Уулчин хүнд өөрийн залхуурлыг давж гарах бэлтгэл хэрэгтэй. Уулчин хүн шантрах ёсгүй. Ууланд багаараа л авчирч таардаг тул багийн гишүүдээ манлайлах, дагалдах, хамтарч чадах сэтгэлзүйн бэлтгэл, дадал хэрэгтэй.
Товчоор хэлвэл уулчин хүн сэтгэлзүйн цогц боловсролтой байх ёстой. Гагцхүү тийм боловсролтой уулчинд хүнд л гутал, малгай зэрэг багаж хэрэгслүүд хэрэг болно. Үгүй бол ямар ч сайн гутал, малгай байгаад яах билээ.
Уулын оргилд хүрнэ гэдэг гутал, малгайн асуудал биш. Тийм учраас боловсрол гэдэг нь тоо, хэл, түүх, уран зохиолын хичээл дээр онц авах, математикийн олипиадад түрүүлэх асуудал огтхон ч биш гэдгийг магад одоо ойлгосон байхаа. Учир нь эд бол багаж, хэрэгсэл.
Бид хүүхдээ уран дархан болгох нь чухал болохоос биш, дарханы багаж хэрэгсэлээр нүдэх нь хоёрдох, чухал биш асуудал юм. Нэгэнт уран дархан болгочихвол тэрээр өөрөө багажаа олоод авчихна. Зорилго дэвшүүлж чаддаг, хүсэл тэмүүлэлтэй хүн болгоод бэлтгэчихвэл тэрээр өөрөө яаж ийж байгаад англи хэлээ сурчихна.
Тэгэхээр та 9 сарын 1 болж хүүхдээ сургуульд өгсөн боловч, сургууль таны хүүхдийг уулчин, уран дархан болгохгүй. Энэ гол хариуцлага тан дээр хэвээрээ үлдлээ. Уулчин хүн гэж уулын гуталтай хүн биш. Уран дархан гэж хурц цүүц барьсан хүн биш юм.
Амжилт хүсье.
Эх сурвалж: Хүүхдээ яаж мундаг хүн болгох вэ?