Эрхэм ерөнхий сайд аа! Амарч болоогүй юу?
ЭРХЭМ ЕРӨНХИЙ САЙД АА!
Энэ Монгол орон чинь хэдхэн хүнтэй эзгүй арал юмуу, эсвэл хэнээс ч хамааралгүй Хойд Солонгос юмуу? Манай Засгийн газар яахаараа үргэлж гэнэтийн шийдвэр гаргаж, ажил будилуулж байдаг юм бэ? Олон улсын хурал зөвлөгөөн, гадны түншүүдтэй хийхээр төлөвлөсөн зүйлс, нааш цааш нислэг, ажил хэрэг энэ бүхэн яах вэ? Хэдий болтол төлөвлөлтгүй, тэр өдрийн тэнгэрт даатгаж, галзуу юм шиг амьдрах вэ? Би өөрийгөө орчин үеийн соёлт орны 2 сая дөхүү хүн амтай Нийслэл хотын иргэн гэж боддог. 21-р зуун гарчихаад байхад хөдөө заншил, нарны цагт захирагдаж байгаад гомдолтой байна. Энэ Засгийн газарт цаг хугацаа, ажлын төлөвлөлт, хариуцлага гэж мэддэг хүн байна уу? Японд лав тухайн жилийн бүх ажлын болон амралтын өдрүүд аль хэдийн гарчихсан, календар нь жил жилээрээ тогтсон байдаг. Захын компанийн дундаас дээш менежер, хэлтсийн даргаас асуугаад үзэхтүн. Ирэх 6-р сарын төлөвлөгөө нь өдрөөрөө биш, бүр цагаараа гараад битүү зоогдчихсон байх вий. Таны болон манайхны гэнэтийн айлчлалууд тэдэнд хэчнээн хүндрэл учруулдагийг үе үеийн дарга нар мэддэг ч үгүй байх! Хүлээн авч байгаа бүх хүний төлөвлөгөөг самарч хаядаг юм. Тэд дипломат зангийн үүднээс наанаа хэлэхгүй. Түүнээс биш таны Ерөнхий сайд байх эсэхээс эс хамаарч бүгд нягт нарийн төлөвлөгөөтэй учир ирэх 7 хоногт бүү хэл, ирэх сард уулзъя гэвэл "нөү" шүү дээ. Ерөнхий сайдаа, дэлхийн иргэншилт хэсэг нь ингэж амьдарч байна. Тэдний наад захын соёлтой хөл нийлүүлж чадахгүй байхад нефть-химийн үйлдвэр, Эрдэнэс Таван толгойн IPO, мега төслүүд, төмөр зам, ёстой цаашаа шүү дээ! Төлөвлөлтгүй, галзуу хүмүүстэй хэн хамтарч ажиллах билээ?
Сурагчдын амралт гээд л бас хэдхэн хоногийн өмнө гэнэт өөрчилнө. За хичээл орох нь гэтэл 7 хоногоор сунгана. Түүнийг амралт байсан өдрүүд рүү огцом шилжүүлэх учраас гадагш дотогш явах гэж байсан хүмүүс эсвэл нислэгээ цуцална, эсвэл цайрахад хүрч таслаад явна. Жилд ганц удаа биш, хэд хэдэн удаа улс даяар нь сэгсэрч хаядаг ийм л Засгийн газартай улс бид.
Өвөл утаа униар ихэсч, ханиад томуу дэлгэрдэг үеийг бид олон жилийн дунджаас мэднэ. Яагаад эртхэн календараа зоочихож болдоггүй юм? Зарим баярууд тухайн үеийнхээ гаригийн байдлаас хамаарч шилжүүлэх нь үр дүнтэй байж болно, түүнийг яагаад жилийн өмнөөс тооцчихож болдоггүй юм? Хэд хоног амрах нь дүүрч, хэд хоног ажиллах нь дүүрч. Гол нь төлөвлөгөөтэй, замбараатай, хариуцлагатай амьдармаар байна! Хэдэн хүн тэжээж байгаа хувийн хэвшлийнхэн чинь энэ бүх гэнэтийн шийдвэрүүдийн хөлд чирэгдэж дууслаа. Одоо үүнийгээ болъё. Цаг тулгуу гэнэтийн тогтоол, шийдвэр гаргаж иргэдээ хохироохгүй байхыг НИЙСЛЭЛИЙН СОЁЛТ ИРГЭДИЙН ӨМНӨӨС ШААРДАЖ БАЙНА!
М.Тулгат (НИТХ-ын төлөөлөгч)
