Пүрэв гарагт Парисын цагдаагийн төв байранд хутгаар зэвсэглэсэн этгээд халдаж 4 цагдаагийн ажилтан амиа алдлаа гэж хотын прокурор Реми Хейц мэдэгдсэн болохыг CNN мэдээллээ.

Гурван цагдаа болон цагдаагийн захиргааны эмэгтэй ажилтан албан үүргээ гүйцэтгэж байхдаа алагдсан бөгөөд дараа нь гэмт хэрэгтэн буудуулж амиа алдсан байна.

Тус хэрэг Парисын төвийн Сите арал дахь Нотр Дамийн сүмийн ойролцоо байрлах барилга дотор болжээ.

Хэргийн нэг хохирогч мэс засал хийлгэж байна гэж Францын Дотоод хэргийн сайд Кристоф Кастанер мэдэгдсэн ба тэрбээр хохирогчийн биеийн байдал, бэртлийн талаар нарийвчлан хэлээгүй юм.

Кастанер "Аллага үйлдсэн хүн 45 настай бөгөөд 2003 оноос хойш цагдаагийн хэлтсийн ажилтан байсан. Одоогоор ямар шалтгаанаар  хэрэг үйлдсэн нь мэдэгдээгүй байна" гэжээ.

Түүнчлэн халдлага үйлдэгчийн эхнэр баривчлагдсан гэж Парисын прокурорын эх сурвалж CNN-д ярьжээ. Түүнийг халдлагын газар байсан эсэх болон яагаад баривчлагдсан нь одоогоор тодорхой бус байгаа аж. 

Хэрэг гарсан барилга хаагдаж, замууд дээр нь цагдаа, гал сөнөөгчид, түргэн тусламжийн машинууд байв.

Ойролцоох метроны буудал аюулгүй байдлын арга хэмжээ авч үйл ажиллагаагаа зогсоогоод байсан боловч өнөөдрөөс хэвийн ажиллаж эхэлжээ. 

Францын Иль-де-Франсын бүс нутгийн цагдаагийн газрын үндэсний нарийн бичгийн дарга Лойк Трэверс BFM телевизэд өгсөн ярилцлагадаа гэмт хэрэгтэн "20 гаруй жилийн турш бидний дэргэд хамт байсан" гэж хэлсэн байна.

Түүнчлэн Ерөнхийлөгч Эмануэль Макрон, Ерөнхий сайд Эдуард Филипп, Дотоод хэргийн сайд Кристоф Кастанер нар хэргийн газарт очжээ.

Элизейн ордноос хийсэн мэдэгдэлд "Ерөнхийлөгч цагдаагийн бүх ажилчдад дэмжлэг үзүүлж, эв нэгдлээ илэрхийлэхээр цагдаагийн газарт очсон" болохыг дурдсан байна.

Парис хотын дарга Анне Идалго твиттер хуудас дээрээ "Цагдаагийн төв байранд болсон аймшигт халдлагын дараа Парис хот тэр чигтээ гашуудаж байна. Хэд хэдэн цагдаагийн ажилтан амиа алдсанд маш их харамсаж байгаа бөгөөд тэдний ар гэр, хайртай дотны хүмүүст нь гүн эмгэнэл илэрхийлж байна" гэж бичсэн байв.

Мөн тэрбээр "Парисын аюулгүй байдлыг хангадаг нийт  үүрэг гүйцэтгэж байгаа цагдаагийн байгууллагынхны хүчин чармайлтад талархал илэрхийлье. Бид тэдэнд маш их өртэй" гэж нэмж дурджээ.