Хуучин хонгилынхон толгойгоо өндийлгөж байна. Засгаа авч шидээд замаа засна гэнэ ээ. Тост тосон бумбаа буцаан авч, нурсан хонгилынхоо туурга тотгыг тоосго тоосгоор нь дахин өрөх юм байх. Шинэ хонгилынхонд өширхөөд удсан парламент Засгийг унагаалцаад мөнх сууж, энх жаргах хүсэлтэй. Парламент тарах сургаар төрийн ордонд төрлөөрөө жаргах шуналтай гишүүдийн энэ дур хүсэл дээр нь дөрөөлөн иймэрхүү найраа явагдаж байна. Яам газруудаа ч сэмхэн хувааж, сэнтий амлаад гүйлдэж байна. Яг үнэндээ бол шинэ тутам байгуулагдаж, МАН-ын 80-аад оны хэдхэн залуугийн, тэр дундаа Уул уурхайн яам тойрсон эрх мэдэлтнүүдийн амбиц ба авдар болчхоод байгаа нэн шинэ хонгилынхонд Үндсэн хуулийн өөрчлөлт таалагдахгүй байгаа.

Хуучин хонгилынхонд ч таалагдахгүй юм олон. Тиймдээ тулбал Монголын Үндсэн хуулийн өөрчлөлтийн монголчуудад бол амин чухал хоёр ч заалт урд хойд хоёр хөршид маань таалагдаагүй. Энэ утгаараа урд ба хойд хөршийн дохио зангаанд автдаг нэр бүхий хоёр хүн хөдлөөд эхлэв үү?

За зүгээр шууд хэлэхэд Монголын парламентад хоёр хөршийн маань хөл гар, хэтэвч хэлхээ болсон нөхөд эрх ашгаараа эрэмбэлэгдээд, эрх ямбаараа танигдаад сууж л байдаг шүү дээ. Шинэ ба хуучин хонгилын дундуур зүтгүүлж, Үндсэн хуулиндаа өөрчлөлт оруулчихаад төрөө форматлах гээд дайрчихсан Хүрэлсүх шаваг зулгааж, зүлэг тэгшилсээр яваад шаварт суухад ойрхон ирлээ. Үндсэн хуулийн нэмэлт өөрчлөлтөд тавьсан Ерөнхийлөгчийн хориг парламентыг ийнхүү бужигнуулж, МАН-ыг хагалж, хуучин хонгилынхонд боломж авчрав уу, эсвэл шинэ хонгилын цадахаа мэддэггүй залуус хэт даварч хэнхдэг цээжээ дэлдсээр ширээ гулсахад хүрч байна уу? 

МАН өөрөө хүлээн зөвшөөрч чадахгүй л байгаа болохоос аль эрт шинэ хонгилтой болж, тэр нь ч бас нам дамнасан сүлжээ үүсгэчихсэн шүү дээ. Ямартай ч өнөөдрийг хүртэлх бүх өөрчлөлтийг анхлан авчирсан алдарт 33-ын бүлэг эхэлснээ дуусгаж, зорьсноо эцэслэж, Үндсэн хуулийн өөрчлөлт, үүнийг дагаж ирэх Монголын боломжуудыг хамгаална гэдэгт итгэе. Амьдрал хэцүү, ард түмэн тэсрэхэд ойрхон байна. 60 тэрбумын аман яриаг тойрч мянга дэвээд, ЖДҮ-чдээ барьцаалж хэдэн зуу дахин хошхироод...одоо энэ бүхнээс залхсан.

Зоригийн алуурчныг одоо хүртэл олоогүй шоудсан хүмүүс энэ мэтийн идэш уушныхаа буруутан хийгээд буянтныг илчилнэ гэдэгт итгэлээ юү. Яг үнэндээ өөр юу ч биш, өөрчлөлтийг хүлээж, өөрчлөлтөд итгэж, өөрчлөлтийн зүг саравчилж, өөрчлөлтөд найдсан найдвар нь л тэднийг торгоон барьж байна. Өөрөөр бол засгаараа наадаж, парламентаараа даажигнаж, танхимаараа ээлжлэн шоу тавьж, тамга хадаг солилцохоос чинь залхав.

Хууртахаа ч болив. Түлхүүрээ булаацалдсан энэ олон хонгилын хаагуур нь явах вэ? Түлхүүр тойрч дэвдэг төртэй байгаад хаа хүрэх вэ?

Р.Эмүжин