ОХУ нь ВК-2500 хөдөлгүүртэй МИ-171 нисдэг тэргээ Хятадад нийлүүлсэн бөгөөд гэрээний дагуу тэд 12 ийм нисдэг тэргийг Хятадын талд нийлүүлнэ гэдгийг ТАСС агентлагт мэдээлжээ.
2018 оны арван хоёрдугаар сард ВК-2500 хөдөлгүүртэй МИ-171 нисдэг тэрэгний туршилтын нислэгийг Хятадын Лицзян мужийн өндөр ууланд хийж байжээ. "Нисдэг тэрэг нислэгийнхээ үеэр 3,300 метрийн өндрөөс 3 тонн усыг асгах даалгаврыг гүйцэтгэсэн бөгөөд өмнө нь түймрийн бүсэд энэ ангиллын нисдэг тэргийг ашиглаж байгаагүй" гэж хэвлэлийн төлөөлөгч хэлэв.
Улмаар БНХАУ-ын Иргэний нисэхийн алба энэ оны эхээр ВК-2500 хөдөлгүүртэй МИ-171 нисдэг тэрэгт үндэсний гэрчилгээг олгож энэхүү нисдэг тэргийг Хятадад нисгэх боломжтой болгожээ.
Оросын талаас МИ-171A2 нисдэг тэрэгний гэрчилгээг баталгаажуулах журмыг 2020 онд дуусгах төлөвтэй байна.
"Одоогоор МИ-171А2 нисдэг тэрэгний гэрчилгээг баталгаажуулах ажил хийгдэж байна. Гэрчилгээжүүлэх журмыг дуусгахад шаардлагатай бүх материалыг БНХАУ-ын Иргэний нисэхийн удирдлагын газарт илгээж, баталгаажуулахаар хүлээж авсан бөгөөд 2020 онд дуусах төлөвтэй байна" гэж албаны хүн мэдэгдэв.
МИ-171А2 бол МИ-8/17/171 нисдэг тэрэгний хамгийн сүүлийн сайжруулсан хувилбар юм. Энэ нь дижитал хяналтын систем бүхий VK-2500PS-03 хөдөлгүүртэй, X хэлбэрийн эргэлт тогтворжуулагч ротор, сайжруулсан аэродинамик тоногтой аж.
Нисдэг тэргийг өдөр шөнийн алинд ч, нам дор газар, өндөр ууланд болон ямар ч температурт, чийглэг, хуурай орчинд, усны гадарга дээр ч ашиглах боломжтой.
Мөн ОХУ зорчигч, бараа тээвэрлэх боломжтой 2 ширхэг Ансат нисдэг тэргийг 2020 оны эхний хагаст Хятадад нийлүүлэхээр төлөвлөжээ. Ансат бол зорчигч, бараа тээвэрлэхэд ашиглаж болох хөнгөн 2 хөдөлгүүртэй нисдэг тэрэг юм. Орост эдгээр нисдэг тэрэгнүүдийг агаарын түргэн тусламжийн үйлчилгээнд өргөн ашигладаг.
Өнөөдрийн байдлаар Орост үйлдвэрлэсэн 350 орчим нисдэг тэргийг Хятадад ашиглаж байгаа ба Оросын тал МИ-171, КА-32 нисдэг тэрэгнүүдэд засвар үйлчилгээ хийх төв байгуулах талаар Хятадын түншүүдтэй хэлэлцээрээ үргэлжлүүлж байна.
Хятад бол Оросын онгоц нийлүүлэх хамгийн чухал стратегийн түнш юм гэж Оросын нисдэг тэрэг холдингийн төлөөлөгч мэдэгдэв. Тэрбээр "Оросод үйлдвэрлэгдсэн 350 орчим нисдэг тэрэг Хятадад одоо үйл ажиллагаагаа явуулж байгаа бөгөөд бид хамтын ажиллагаагаа өргөжүүлэхээр төлөвлөж байна. 2018 оны эхээр 20 Ансат нисдэг тэргийг Хятадад нийлүүлэх гэрээ байгуулагдсан" гэж нэмж дурджээ.