200 гаруй хүүхдийг хүчирхийлсэн гаж донтон шоронд нас барсан байдалтайгаар олджээ
Британийн хамгийн аймшигтай бага насны хүүхэд сонирхдог гаж донтноор нэрлэгдсэн эр шоронд нас барсан байдалтайгаар олдсон болохыг CNN мэдээллээ.
Бараг 200 гаруй Малайзын хүүхдийг хүчирхийлсэн 33 настай Ричард Хакл ням гарагт Английн Йоркшир хотод байрлах Full Sutton шоронд нас барлаа гэж Их Британийн Хууль зүйн яамнаас мэдэгдэв.
Их Британийн хэвлэл мэдээллийн хэрэгслүүд Хаклыг хутгалуулж амиа алдсан гэж мэдээлж байна.
Хакл 6 сараас 12 хүртэлх насны хүүхдүүдийг хүчирхийлж, гэмт хэрэг үйлдсэн тул 2016 онд түүнийг бүх насаар нь хорих ялаар шийтгэж байсан юм.
Хууль зүйн яамнаас Хаклыг 10-р сарын 13-нд нас барсан болохыг баталсан боловч "Мөрдөн байцаалтын ажиллагаа үргэлжилж байгаа үед нэмэлт тайлбар өгөх нь зохисгүй" гэж хэлэв.
Хаклыг ихэнх гэмт хэргээ үйлдсэн Малайзаас нутаг буцаж байхад нь Гатвик нисэх онгоцны буудал дээр 2014 онд баривчилж байжээ. Тэрбээр интернетийн Dark web-д нийтэлсэн блог дээрээ хүүхдүүдийг хүчирхийлсэн гэдгээ хүлээн зөвшөөрсөн байна.
UK News News-ийн мэдээлж буйгаар Хакл 9 жилийн турш Малайзад Христийн сүмийн англи хэлний багш нэр дор 6 сараас 12 настай ядуу амьдралтай хүүхдүүдийг хүчирхийлж байжээ. Мөн тэрбээр Камбожид хүүхдийн хүчирхийлэл үйлдсэн гэж Үндэсний гэмт хэрэгтэй тэмцэх газар (NCA) мэдэгдэв.
Гэрэл зурагчин Хакл нь сургууль, өнчин хүүхдүүдийн асрах газарт хүүхдүүдийг хүчирхийлсэн тухай зураг, видео бичлэгээ авч Dark web дээр өөр бусад гаж донтнуудтай хуваалцаж байсан нь шүүх хуралдааны үеэр ил болж байжээ.
Албаны хүмүүс Хаклын компьютер, камераас хүүхдүүдийн 20.000 гаруй зохисгүй зургийг олж сэргээсэн бөгөөд тэдгээрийн 1.000 гаруй нь түүнд хүчирхийлүүлсэн байх магадлалтай аж.