Каталонид жагсагчид болон цагдаа нарын хооронд мөргөлдөөн гарсны улмаас 182 хүн шархаджээ гэж El Pais сонин мэдээлжээ. Тэдний ихэнх нь буюу 152 нь Барселон хотод шархадсан байна.
Мөн баасан гарагаас эхэлж Барселон хотод ажил хаялт эхлэв. Эсэргүүцлийн жагсаал нь бүс нутгийн жижиг хотууд, суурин газруудад болж байгаа ч хамгийн том эсэргүүцлийн жагсаал Барселон хотод болжээ.
Барселон дахь цагдаагийн төв байрны урд болсон жагсаал эсэргүүцэгчид болон цагдаа нарын хоорондох мөргөлдөөн болж хувирав. Улмаар цагдаа нар жагсагчдын эсрэг нулимс асгаруулагч хий, ус шүршигч бууг ашиглахаас өөр аргагүйд хүрчээ.
Урьдчилсан мэдээгээр Барселон хотод хамгийн багадаа 52 хүн баривчлагдсан ба жагсагчид гудамжинд эсэргүүцлээ илэрхийлж, хог шатааж, хаалт барьсаар байна.
Өнгөрсөн даваа гарагаас хойш үргэлжилж буй Каталонийн жагсаал цуглаан нь Испанийн Дээд шүүх Каталонийн улс төрчдийг 2017 онд тус бүс нутгийн тусгаар тогтнолын төлөө бүх нийтийн санал асуулга зохион байгуулсан хэргээр 13 жилийн хорих ял оноосонтой холбоотой аж.