Хонконгийн засгийн газар хотоо сэргээн босгоход санхүүгийн дэмжлэг үзүүлнэ
Улс төрийн үймээн самуунаас болж Хонконг 10 жилийн хугацаан дахь анхны том хямралтайгаа нүүр тулгарч байгаа тул хотын удирдлагууд санхүүгийн дэмжлэг үзүүлэхээ мягмар гарагт мэдэгдсэнийг Ройтерс мэдээллээ.
Сүүлийн таван сарын турш засгийн газрын эсрэг хүчтэй эсэргүүцлийн жагсаалууд болж Хонконгийн Азийн санхүүгийн төв гэх нэр хүнд унаж, аялал жуулчлал, худалдааны чухал салбарууд сүйдэж, олон бизнес хаалгаа барихад хүрсэн юм.
Хонконгийн санхүүгийн нарийн бичгийн дарга Пол Чан хотын эдийн засгийг дэмжиж, ялангуяа тээвэр, аялал жуулчлал, жижиглэн худалдааны салбарт 2 тэрбум хонконг доллар буюу 255 сая ам.долларын тусламж үзүүлэхээ зарлалаа.
Тэрбээр "Эдийн засгийн байдал маш хурдтайгаар доройтож байгаа тул бид энэ санхүүжилтийг зарим чухал салбарт чиглүүлэхээр төлөвлөсөн" гэж хэвлэлийн бага хурал дээрээ хэлэв.
Тус санхүүгийн тусламж нь төсвийн алдагдалд оруулах магадлалтай байгаа ч улсын төсөв энэ бүхнийг дааж чадна гэж тэр дурдав.
Тээвэр, орон сууц хариуцсан нарийн бичгийн дарга Фрэнк Чан хэвлэлийн бага хурал дээр "Хэрэв нийгэм бага зэрэг тайвширч жагсаал цуглаан, хүчирхийллээ зогсоож, эв найрамдалтайгаар шийдэлд хүрч чадвал бид илүү ихийг хийх болно" гэж хэлэв.
Гэвч Ардчиллын төлөөх эсэргүүцлийн жагсаал, иргэд болон цагдаа нарын мөргөлдөөн, тэдний бензин бөмбөг, тоосго шидэх гэх мэт хүчирхийллийн үйлдлүүд хараахан дуусаагүй л байна.
Хонконгийн нөхцөл байдал сүүлийн хэдэн долоо хоног харьцангуй тайван байх төлөвтэй байсан ч ням гарагт олон арван мянган эсэргүүцэгчид жагсаж, цагдаа нартай мөргөлдөж эхэлжээ.
Даваа гарагийн орой цагдаа нар жагсагчдыг тараахын тулд нулимс асгаруулагч хий цацсан бол оршин суугчид тэднийг хэт их хүч хэрэглэсэн гэж бухимдаж байв.
Зургадугаар сараас тус эсэргүүцлийн хөдөлгөөн улам нэмэгдэж, 2 хүн цагдаа нарт буудуулж, олон мянган хүн шархаджээ. 2600 гаруй хүн баривчлагдсаны нэг нь 12 настай хүүхэд байсан юм.
Хонконгийн удирдагч Кэрри Лэм эсэргүүцлийн жагсаал эхэлснээс хойш хоёр сар хагасын дараа ялтан шилжүүлэх хуулийн төслийг эргүүлэн татахаа мэдэгдсэн ч иргэдийн Ардчиллын төлөөх тэмцэл зогссонгүй.
Хэрэв уг хуулийн төсөл батлагдсан бол Хонконг бие даасан шүүх засаглалаа алдаж, ял эдэлж буй хоригдлууд Хятадын Коммунист намын хяналттай шүүхэд шилжих байв.
Жагсагчид одоо бүх нийтийн сонгох эрхийг хангах, цагдаагийн байгууллагынхан хараат бус мөрдөн байцаалт явуулах, эсэргүүцлийн үеэр баривчлагдсан хүмүүст өршөөл үзүүлэх, эсэргүүцэгчдийг үймээн дэгдээгч гэж үзэхийг зогсоохыг шаардаж байна.
Харин Кэрри Лам эдгээр шаардлагыг няцааж, цагдаагийн байгууллагын үйл ажиллагааг тууштай хамгаалж, эсэргүүцэгчдийг тэмцлээ бүр мөсөн зогсоохыг уриалсан юм.
Тэрбээр олон нийтийн жагсаал дээр нүүрний маск хэрэглэхийг хориглохыг уриалсан нь иргэдийг улам их уурлуулж, жагсагчид нэг жил шоронд хоригдох эрсдэлтэй байсан ч юунаас ч айлгүйгээр эсэргүүцлээ илэрхийлсээр байгаа юм.