Оросын зургаан сөнөөгч онгоц мягмар гарагт Өмнөд Солонгосын агаарын довтолгооноос хамгаалах бүсэд зөвшөөрөлгүйгээр нэвтэрсэн тул штабын дарга нар сөнөөгч онгоцнуудыг эргүүлэн татахыг Орост сануулсныг Yonhap агентлаг мэдээллээ.

Тодруулбал, А-50 онгоц, гурван СУ-27 сөнөөгч онгоц, хоёр ТУ-95 бөмбөгдөгч онгоц нь Солонгосын Агаарын довтолгооноос хамгаалах бүсэд өглөөний 9:23 минутаас 2:44 цагийн хооронд дөрвөн удаа нэвтэрчээ. Сөнөөгч онгоцнууд өдрийн 13 цаг 13 минутад буцахаасаа өмнө уг бүсэд нийт дөрвөн цаг орчим байсан аж.

Сөнөөгч онгоцнууд Солонгосын хойг, тэр дундаа зүүн хойд арлууд болох Докдо, Зүүн тэнгис дэх Уллеунг арлын далай дээгүүр нисжээ. 

Улмаар Өмнөд Солонгосын Агаарын цэргийн хүчин F-15K, KF-16 тийрэлтэт онгоц зэрэг 10 орчим байлдааны онгоцнуудаа хөөргөж, тэдэнд анхааруулга өгч гарахыг шаардсан байна.

Тус үйл явдал нь энэ жил ОХУ-ын сөнөөгч онгоцнууд Өмнөд Солонгосын агаарын довтолгооноос хамгаалах бүсэд зөвшөөрөлгүй нэвтэрч буй 20 дахь тохиолдол юм.

Өмнө нь 7-р сарын 23-ны өдөр Оросын А-50 онгоц Өмнөд Солонгосын нутаг дэвсгэрт Докдогийн дээгүүр хоёр удаа довтолж, Агаарын цэргийн хүчин хэдэн зуун анхааруулгын цохилт өгч байсан.

Мөн Оросын хоёр, Хятадын хоёр цэргийн нисэх онгоц Докдо болон Уллеунг арлын хооронд хамтарсан агаарын цэргийн маневр хийж байжээ.

Харин 8-р сард Оросын хоёр ТУ-142 эргүүлийн онгоц Зүүн тэнгис дээгүүр нисэж агаарын хилийн зурвасыг зөрчсөн юм.

Энэ бүгдээс урьдчилан сэргийлэхийн тулд Өмнөд Солонгос, Орос улс нислэгийнхээ мэдээллийг солилцох зорилгоор агаарын хүчний хооронд цэргийн утсан шугам байгуулахыг хэлэлцэж байгаа аж.

Хоёр тал энэ асуудлыг 2004 оноос хэлэлцэж эхэлсэн бөгөөд өнгөрсөн оны арван нэгдүгээр сард санамж бичигт тусгагдсан  төслийн талаар санал солилцжээ.

Агаарын довтолгооноос хамгаалах бүсийг Солонгосын Агаарын цэргийн хүчин анх 1950-53 оны Солонгосын дайны үеэр 1951 онд агаарын мөргөлдөөнөөс урьдчилан сэргийлэх зорилгоор зурж байсан ба өнгөрсөн жил Сөүл үүнийг өргөжүүлэх шийдвэр гаргасан юм.

Агаарын бүс нь тухайн улсын агаарын орон зайн нэг хэсэг биш бөгөөд олон улсын хууль тогтоомжоор хязгаарлагддаггүй аж.