Apple iPhone 5-ийн хэрэглэгчид амралтын өдрүүдээс өмнө үйлдлийн системээ шинэчлэхгүй бол интернетэд нэвтрэх боломжгүй болно гэж анхааруулсныг BBC мэдээллээ.
Өөрөөр хэлбэл, iOS 10.3.4 шинэчилсэн үйлдлийн системийг 11-р сарын 3-наас өмнө татаж аваагүй хэрэглэгчид цаг, огноонд тулгуурласан аппликэйшнуудыг ашиглаж чадахгүйд хүрэх аж.
Үүнд App Store, и-мэйл, iCloud, интернетийн тусламжтайгаар ашиглагддаг бусад аппликэйшнууд орно.
Хэдийгээр энэ нь үйлдлийн системийн хамгийн сүүлийн хувилбар биш боловч тус загварын хувьд хамгийн сүүлийн үеийн хувилбар юм.
Мөн Apple компани iPhone 4S болон iPad-ийн хуучин загварыг ашигладаг хүн бүрийг GPS-ээ ажиллуулахын тулд хамгийн сүүлийн үеийн програм хангамжийг татаж авах хэрэгтэй гэж мэдэгджээ.
Үүнд эхний үеийн iPad mini, дөрөв дэх үеийн iPad, түүнээс өмнөх загварууд багтана.
iPhone 5 нь 2012 оны 9-р сард худалдаанд гарч байсан бөгөөд эхний 24 цагийн дотор хоёр сая урьдчилсан захиалга авч байсан ба нийт 5 сая орчим iPhone 5 гар утас зарагдсан байна.