Оросын хакерууд дэлхийн допингийн эсрэг байгууллагууд руу цахим халдлага үйлдсэн гэв
Microsoft компани Оросын хакерын Strontium бүлэглэлийг Допингийн эсрэг байгууллагуудын сүлжээг хакердсан гэж буруутгаж байгааг New York Post сонин мэдээлжээ.
Microsoft-ын Аюулгүй байдлын тагнуулын төв "Зарим халдлагууд амжилттай болсон боловч дийлэнх нь бүтээгүй. Хакерууд 9-р сарын 16-наас эхэлж цахим халдлага үйлдэж эхэлсэн бөгөөд энэ нь Fancy Bear / APT28 гэгддэг Strontium хакерын бүлэглэлээс гаралтай" гэж мэдэгджээ.
Түүнчлэн тус бүлэглэл нь Оросын засгийн газартай холбоотой ажилладаг болохыг Microsoft компанийн ерөнхийлөгч Брэд Смит хэд хэдэн нотлох баримтаар баталгаажуулан мэдэгдсэн байна.
Microsoft нь одоогоор допингийн эсрэг яг ямар агентлаг эсвэл байгууллага халдлагад өртсөн болохыг тодорхой хэлээгүй байгаа юм.
Харин Дэлхийн допингийн эсрэг агентлагийн /WADA/ хэвлэлийн төлөөлөгч Microsoft компанийн гаргасан үр дүнгийн талаар мэдэж байсан хэрнээ "WADA-ийн системд ямар нэгэн зөрчил гарсан баримт байхгүй" гэж хэлжээ.