Твиттер компаниас өөрийн сүлжээн дээрээ улс төрийн сэдэвтэй бүх зар сурталчилгааг хориглох гэж байна. Учир нь тэд "Улс төрийн амжилтыг өөрөө олох ёстой болохоос биш худалдаж авах ёсгүй" гэж үзэж байгаа аж.
Компанийн гүйцэтгэх захирал Жек Дорси "Интернэтийн зар сурталчилгаа нь асар их хүчтэй байдаг. Гэхдээ энэ нь арилжааны сурталчлагчдад маш үр дүнтэй байдаг боловч улс төрд ихээхэн эрсдэл дагуулдаг" гэж жиргэжээ.
Харин нийгмийн мэдээллийн хэрэгслийн өрсөлдөгч Facebook нь саяхан улс төрийн зар сурталчилгаанд хориг тавих шийдвэрийг эсэргүүцсэн юм.
Твиттерийн энэхүү хоригийн талаар Ерөнхийлөгч Дональд Трампын сонгуулийн компанит ажлын менежер Брэд Парскал энэ хоригийг "Трамп болон консервативуудыг дуугүй болгох гэсэн зүүнийхний нэгэн оролдлого" гэж мэдэгдэв.
Гэхдээ Ардчилсан намын Жо Байденийн компанит ажлын хэвлэлийн төлөөлөгч Билл Руссо "Бид төлбөртэй зар сурталчилгаанаас мөнгө олох эсвэл ардчиллын үнэт зүйлийн аль нэгийг сонго гэвэл ардчиллын бүрэн бүтэн байдлыг сонгоно" гэж хэлжээ.
Фэйсбүүкийг үндэслэгч Марк Зукерберг компанийнхаа бодлогыг хамгаалж "Хувийн компаниуд улс төрчдийг эсвэл улс төрийн мэдээг цензурдах нь ардчилал мөн гэж би бодохгүй байна" гэж тэр сэтгүүлчидтэй хийсэн бага хурлын үеэр хэлсэн байна.
Твиттерийн хориг 11-р сарын 22-наас эхлэн хэрэгжиж эхлэх бөгөөд 11-р сарын 15-ны өдөр хүртэл дэлгэрэнгүй мэдээлэл цацагдах аж.