Хятадын баг Дэлхийн цэргийн спортын наадмаас "булхайцсан" шалтгаанаар хасагджээ
Дэлхийн улс орнууд Хятадын тамирчдыг шүүгчдийг болон зохион байгуулагчдыг "хууран мэхэлж байна" гэж мэдэгдсэний дараа Хятадын багийг Дэлхийн цэргийн спортын наадмаас хассан гэдгийг CNN мэдээллээ.
Энэхүү наадмын үеэр БНХАУ-ын тамирчид эмэгтэйчүүдийн дунд зайн гүйлтийн тэмцээнд эхний, хоёр, дөрөвдүгээр байруудыг эзэлсэн ба эрчүүд нь хоёрдугаар байрт жагссан байсныг Олон улсын Ориентенгеринг Холбооноос гаргасан мэдэгдэлд дурджээ.
Харин тэмцээний үеэр Европын зургаан улс, тэр дундаа Орос, Франц улс гомдол гаргасны дараа шүүгчид хятадын гүйлтийн тамирчдад орон нутгийнх нь үзэгчид тусалж байсныг илрүүлсэн байна.
Улмаар БНХАУ-ын багийг холын зайн гүйлтийн тэмцээнд оролцохыг хориглосон гэж ОУХБ мэдээллээ. Гэвч бусад төрлүүдэд хятад улс медалийн тоогоороо тэргүүлсэн ба хамгийн ойрын өрсөлдөгч Оростой харьцуулахад хоёр дахин их алтан медаль авсан аж.
ОУХБ-ын Ерөнхий нарийн бичгийн дарга Том Холлоуэлл "Хятадын багийн үйл ажиллагааг нухацтай авч үзэж байна. Мөн бид удахгүй болох ДАШТ-нд өрсөлдөөний шударга байдлыг хангахын тулд цаашид ямар нэгэн арга хэмжээ авах шаардлагатай эсэхийг шалгаж байна" гэж хэлжээ.
Олимпын наадмын нэгэн адил Дэлхийн цэргийн спортын наадам нь дөрвөн жил тутамд болдог. Анх 1995 онд Ромд болж байсан энэхүү арга хэмжээ нь Хятад улсад анх удаа зохион байгуулагдсан юм.
Тус наадамд 109 орны 9000 гаруй тамирчид оролцсон бөгөөд үүнд усанд сэлэх, шүхрээр буух, ориентация, бөхийн төрлүүд багтдаг аж.