Сөүлийн орон сууцны хороолол дундуур явдаг автобусны зорчигчид үнэ төлбөргүй Wi-Fi ашигладаг болно гэж хотын захиргаа лхагва гарагт буюу өнөөдөр мэдэгдсэнийг Yonhap агентлаг мэдээллээ.
Хотын захиргааны хэвлэлийн төлөөлөгч "Бид бүх суурин автобусны маршрутууд дээр үнэгүй Wi-Fi сүлжээг байгуулж дууссан. Харин одоо хот суурингийн автобуснуудад үнэгүй Wi-Fi сүлжээ байгуулах ажлыг эрчимтэй хийж байна" гэж хэлсэн байна.
Зураг дээрх "Maeul" автобус нь хотын ойр орчмын томоохон автобусны зогсоол болон метроны буудлуудтай холбосон маршрутаар явдаг жижиг ногоон автобус юм.
Ийнхүү нийслэл даяар 235 чиглэлд явдаг 1.499 орон сууцны хорооллын автобус, хот хоорондын болон хотын автобусны 81 орчим хувь нь үнэгүй Wifi-д холбогджээ. Үүний зэрэгцээ хотын захиргаа Сөүл хотын эргэн тойронд байрлах 358 гол автобусны зогсоолыг үнэгүй Wi-Fi-аар хангахаар төлөвлөж байгаа гэнэ.
Сөүл хотын захиргаа 2022 он гэхэд үнэгүй Wi-Fi сүлжээг хот даяар нэвтрүүлэхээр ажиллаж байгаа ба олон нийтийн болон орон сууцны гол хэсгүүдийн Wi-Fi сүлжээг одоогийн 31 хувиас нь 100 хувь хүртэл нэмэгдүүлэхээр төлөвлөсөн байна.
"Ухаалаг хот"-ын төслийн бодлогыг удирдаж буй Ли Вон Мок "Бид хөл хөдөлгөөн ихтэй хотын хэсгүүдийг үнэгүй Wifi-аар хангаж, хүмүүсийн харилцах эрхийг өргөжүүлэх зорилготой байна" гэж хэлжээ.
Сөүл хот анх 2011 онд Wi-Fi сүлжээгээ олон нийтэд нээлттэй болгосноор хот даяар утасгүй интернетэд нэвтрэх цэгүүдийн тоо эрчимтэй нэмэгдсэн юм.
