"Шатахууны үнэ буурч байгаа нь хэрэглэгч нарт сайн зүйл" гэж тэрээр өөрийн твитертээ бичсэн бөгөөд нефтийн үнийн энэ уналтад “Саудын Араб, Орос буруутай.Бас худал хуурмаг мэдээлэл-энэ бүхнээс болж зах зээл уналтад орж байна” гэж цагаан ордны тэргүүн дүгнэсэн байна.

9-ны өглөөний байдлаар Brent маркийн нефтийн үнэ нь$33,48 болсон нь ICE-ийн тооцоогоор 35.5% уналттай байгаа юм. WTI  маркийн нефтийн үнэ 38%-иар унаж $29.96 болсон байна. Орой үнэ бага сэргэснээр Brent –ийн үнэ $36.4 хүрчээ.

Нефтийн үнэ ингэж унахад нөлөөлсөн гол шалтгаан нь өнгөрсөн долоо хоногт болсон нефтийн олборлолтыг багасгах тухай тохиролцоонд хүрч чадаагүй явдал юм. ОПЕК+тохиролцоог шинэчлэн сунгахыг ОХУ эсэргүүцсэн ба хоёрдугаар улиралд өмнөх тохиролцоог ямар ч өөрчлөлтгүй сунгах  сонирхолтой байгаагаа тэд илэрхийлж байсан билээ. Энэ тохиролцоог 2019 онд хийсэн бөгөөд 2020 оны 4-р сарын 1 хүртэл хүчинтэй байх юм.

Мөн коронавирусээс болж нефтийн хэрэглээ багасан, олборлолтыг дахин бууруулах шаардлагатай болсон юм. Сар болгон гардаг мэдээллээр ОПЕК нь 2-р сард олборлолтоо тооцож байснаас өдөрт 230 000 баррел-аар багасгасан байна.

Урьд өмнө хийж байсан тооцоо таамаг өөрчлөгдөх болсон шалтгаан нь  COVID-19 бөгөөд ОПЕК-ийн тооцож байгаагаар энэ өвчнөөс болж Хятад болон бусад үйлдвэрлэлийн бүсийн шатахуун хэрэглээ ихээхэн багасах бололтой.

Нефтийн олборлолтоо бууруулах ОПЕК+ тохиролцоо нь Оросын хувьд ашиг багатай байсан ба тэд олборлолтоо бууруулснаар ОПЕК-ын бус улсууд тэр орон зайг нь эзэлж авсан болон энэ салбарын хөгжилд зарцуулах хөрөнгө мөнгө буурах болсон байна. ОХУ нь ОПЕК+ тохиролцооноос гарснаар дэлхийн зах зээл дээр өөрийн тоглолтыг хийж эхлэх магадлалтай.

“Гурван жилийн турш ерөнхийлөгч Трамп нь АНУ-ыг нефт болон хий олборлогч,экспортлогч тэргүүн гүрэн болгохоор зорьж их наядаар долларыг зарцуулан, улс дотроо нефт, хий олборлох хэмжээг эрс нэмэгдүүлсэн билээ” хэмээн Америкийн тоймч Том Луонго дүгнэсэн байна.

Барууны том банкнуудын тоймч нар нь Америкийн занарын хий, нефтийн олборлолт одоо ихээхэн хүнд байдалд орох төлөвтэй гэж үзэж байна.

“ОПЕК+ уулзалт дууссан боловч  ОПЕК-ийн цаашдын баримтлах бодлого нь тодорхойгүй хэвээр үлдлээ. Зах зээл дээрх илүүдэл нефтээс болж үнэ улам бүр буурах ба энэ нь ОПЕК-ын бус улсуудыг ч зах зээлийн нөхцөл байдлыг хэвийн болгох арга хэмжээ авахад хүргэх болно” гэж  Credit Suisse таамаглажээ.

“Одоогийн байдал нь АНУ дахь занарын олборлолтод ихээхэн том дарамт болох бөгөөд энэ төрлийн олборлолт нь WTI-ийн үнэ 1 баррель-40 $ доош нөхцөлд ашиггүй, алдагдал хүлээх болно” гэж Barclays анхааруулж байна.

Саудын Араб нь Орос улсад үнийн дайн зарласан гэсэн мэдээллийг үгүйсгэж байгаа тухай ТАСС мэдээллээ.

"Энэ бол худал зүйл. Бид, Саудын Араб нь Орос улстай үнийн ямар нэг дайн хийх бодолгүй байна" гэж хааны төлөөлөгч нар мэдэгджээ. Тухайн төлөөлөгч нарын хэлснээр Москва нь Эр-Риядын чухал түнш, энэ төрлийн зах зээлийн маш том оролцогч гэнэ. Мөн ОПЕК+ тохиролцоонд хүрч чадахгүй бол Saudi Aramco нь 4-р сард ямар нэг хориглолт хязгааргүйгээр үйл ажиллагаагаа явуулах болно гэжээ.

Олон эх сурвалж нь одоогийн нефтийн зах зээл дээр болж байгаа үйл явдлын буруутныг энэ тохиролцооны  бүх л талууд, тэр дундаа томоохон тоглогч нарыг гэж нэрлэж байгаа юм.

Энэ зах зээлийн хямралт байдалтай холбогдуулан ОХУ-ын ерөнхий сайд Михаил Мишустин нь эдийн засгийн асуудлаар сайд нарын уулзалт хийсэн байна.

Энэ уулзалтын үеэр эрчим хүчний сайд Новак нь Орос улс ОПЕК+тохиролцоонд хүрч чадаагүй явдлаас болж үүсэн гарах үр дагаварт бэлэн байгаа гэдгийг хэлж одоогийн зах зээлийн байдал нь тэдний тооцож байсан тодорхой хувилбарын дагуу явагдаж байгаа гэжээ.

Эрчим хүчний сайдын хэлснээр бол Оросын нефтийн салбар нь өөрийн гэсэн хангалттай нөөцтэй, санхүүгийн хамгаалалттай гэнэ. Энэ салбар нь “зах зээлийн үнэ нь таамаглаж болох ямар ч хэмжээнд хүрсэн байлаа ч” өрсөлдөх чадвартай гэжээ.