Нэг жилд нэг монгол өрх дунджаар 550 $-ыг цагаан сар хийхэд зарцуулдаг бөгөөд монголчууд цагаан сар хийхийн тулд нийтдээ 400 сая $ зарцуулдаг аж. Энэ их мөнгөний 80% нь импортын бараанд зарцуулагддаг болохыг эдийн засагчид тооцжээ. Хэрэв монгол өрх бүр 3 жил хэмнэлт гаргавал асар том бүтээн байгуулалт хийж улс орноо хөгжүүлэх төдийгүй өөртөө болон ирээдүйдээ хөрөнгө оруулж, монгол хүн бүр тээврийн компанийн хувьцаа эзэмших боломж 100% байна. Энэ бол метро байгуулах юм.

7 жилийн өмнө Японы ЖАЙКА байгууллагаас иж бүрэн судалгаа хийж, Улаанбаатарт 17 км урт зам бүхий метро байгуулах төсөл танилцуулж байжээ. Япончууд энэ төслийн өртөг нь 1.2 тэрбум $ болно гэх тооцоо харуулсан байдаг. Энэ нь монголчууд цагаан сарыг ердөө 3 жил өнжихөд цуглах мөнгө ажээ. Хэрэв монгол өрх бүр зохион байгуулалтад орж, "хувьцаат компани" байгуулаад, цагаан сард үрдэг мөнгөөрөө хөрөнгө оруулбал, тээврийн гол асуудлаа шийдэх төдийгүй бүгдээрээ хүчирхэг компанийн хувьцаа эзэмшигч болж, ашиг хүртэх болно. Мөн хувьцаагаа зарах, хувьцаа худалдан авах асар том боломжтой болно. Одоо бидэнд зөвхөн зохион байгуулалт, хариуцлага л хэрэгтэй. Болохгүй бол япончуудаар менежмент хийлгэе.

Метро бол жинхэнэ хөгжил юм! Улаанбаатарт япончуудаар метро бариулбал манай хот дэлхий хөгжингүй хотуудын нэг болж, стратегийн хүчирхэг байгууламжтай болно. Японы метро нь замын түгжрэлийг алга болгох төдийгүй, газар доогуур хот бий болж, эдийн засгийн асар их ашиг тусыг өгөх ажээ. Япончуудын судалгаагаар Улаанбаатар метро шугамтай болбол үүнийг дагаад эдийн засагт олон сайн нөлөө үзүүлэх ба тухайлбал замын түгжээ арилснаар хүмүүс хотын хаана ч ажил эрхлэх боломжтой болж, метроны дагуу үйлчилгээ цэцэглэж, метроны зам дагуух үл хөдлөх хөрөнгийн үнэ 10 дахин өсөх аж. Харамсалтай нь метро байгуулах япончуудын өмнөх санал манай идэж уудаг дарга нарт ашиггүй, унацгүй байсан бололтой. Тэгэсхийгээд дарагдсан аж. Дарга нар дарсан юмыг ард түмэн өөрөө хийж яагаад болохгүй гэж. Ингэж чадвал монголчуудын амьдралд асар том өөрчлөлт гарч, бид дэлхийд толгой өөдөө, цээж тэнэгэр явах болно.