Нойроо бүрэн авч байх нь хүүхдийн сэтгэлзүйд хэрхэн нөлөөлдөг вэ?
Хьюстоны их сургуулийн сэтгэл судлалын тэнхимийн профессор, Нойргүйдэл болон сэтгэл гутралын төвийн захирал Кандис Алфано саяхан хийсэн туршилтынхаа үр дүнг танилцуулсан бөгөөд түүний судалгаанаас үзэхэд нойр дутмаг байх нь хүүхдийн сэтгэл санаа болон сэтгэцийн эрүүл байдалд олон төрлийн нөлөө үзүүлж болдог гэдэг дүгнэлтэд хүрсэн байна.
Хэдийгээр нойргүйдэл, нойр дутмаг байх нь сэтгэл санаанд хэрхэн нөлөөлдөг талаар олон тооны судалгаа байдаг ч хүүхэд дээр чиглэж хийсэн нь маш ховор байдаг билээ.
Алфано багийнхаа хамтаар 7-11 насны 53 хүүхэд дээр судалгаа хийж үзсэн бөгөөд сэтгэл зүйн сорилыг хоёр удаа авсан байна. Эхлээд бүтэн нойртой хоносны дараа хийсэн бөгөөд хоёр дахь нь унтах цагийг нь багасгасны дараагаар хийсэн байна.
“Бид шөнө унтах цагийг нь багасгасны дараа хүүхдийн байгаа байдал, зан төрх, сэтгэл хөдлөлөө илэрхийлэх тал дээр өөрчлөлт орж байсан” гэж Алфано хэлжээ. Гэхдээ сөрөг үр дагавруудаас гадна цөөн тооны сэтгэл зүйн эерэг өдөөлт өгч байсан нь тун хачирхалтай хэрэг байжээ. Гэхдээ уг өдөөлт нь хүүхэд бүхэнд харилцан адилгүй байсан бөгөөд, удаан хугацааны нойр дутмагшилтай хүүхдүүдэд илүү хүнд тусаж байв.
Тэд эерэг болон сөрөг сэтгэгдэл үүсгэх төрлийн зураг, бичлэгүүдийг үзүүлж, хүүхдүүдийн хариу үйлдлүүдэд дүн шинжилгээ хийж байсан аж. Алфоно уг судалгааны дараа "Сэтгэл хөдлөлийн субъектив тайланд үндэслэсэн судалгаа нь нэн чухал ач холбогдолтой боловч нойр хүрэхгүй байх нь хүүхдийн сэтгэцийн эрсдэлийг нэмэгдүүлдэг өвөрмөц механизмын талаар хангалттай их мэдээлэл авч чадаагүй байна” гэжээ. Мөн түүнчлэн уг туршилт дөнгөж эхний шатандаа яваа бөгөөд тийм ч баттай хариулт өгөхөд арай эрт гэж үзэж байгаа юм.
Хэдийгээр баттай үр дүнд хүрээгүй байгаа ч гэлээ тэдний туршилтын үр дүнгээс харахад нойр дутуу байх нь хүүхдийн өдөр тутмын амьдрал, нийгмийн болон сэтгэл санааны байдалд нь нөлөөлж байсан бөгөөд нойр дутуу хүүхдүүд найз нөхөдтэй болох, нийгэмд эрүүл харилцаатай байх зэрэгт арай дутмаг байдал ажиглагдаж байсан.
Алфано өөрийнхөө судалгааг нойр дутуу байх нь хүүхдийн сэтгэлзүйд хэрхэн нөлөөлдөг талаарх бидний ойлголтыг нэмэгдүүлэхэд чухал үүрэгтэй гэж үзэж байгаа бөгөөд цаашид улам лавшруулан судална гэжээ.
Эх сурвалж: ScienceDaily
