Дэлхий дээр 100 гаас ч олон нисдэг машины төсөл хэрэгжиж, туршилт болон бүтээлийн шатандаа явж байгаа. Эднээс цөөн хэд нь л тун амжилттай болоод байгаа юм.
Технологийн өндөр хөгжлийн эрин үе уран зөгнөл биш бодит байдал болж буй өнөө үед бид ойрын 10 жилийн дотор нисдэг машинтай болох нь дамжиггүй юм. Тесла зэрэг олон хүчирхэг технологийн компаниуд нисдэг машин бүтээхээр хичээж ажиллаж байгаа. Үүн дээр нэгэн том өрсөлдөгч болсон нь Япон улсын “SkyDrive” компани юм.
Скайдрайв (SkyDrive) компанийн давуу тал нь нисдэг машины төслөө маш амжилттай хэрэгжүүлээд байгаа төдийгүй жолоочтой нислэгийн туршилтыг маш амжилттай явуулаад байгаа юм. Өнгөрсөн баасан гарагт хэвлэл мэдээллийн хэрэгслээр гарсан бичлэгт “SkyDive” компанийн бүтээсэн нисдэг машин жолоочийн тусламжтайгаар газраас 2 метр өндөрт хөөрч, 4 минутын турш ойролцоох талбайгаар ниссэн байна.
Компанийн тэргүүн Томохиро Фукузава: Бидний ажил тун үр дүнтэй байгаа. Тооцоолж буйгаар бид 2023 он гэхэд нисдэг машиныг нийтийн хэрэглээнд зориулан үйлдвэрлэж эхэлнэ. Гэхдээ бидний хамгийн их санаа зовж буй асуудал бол аюулгүй байдал, гэсэн юм.
Одоогийн байдлаар уг машин нь 10 минут орчим агаарт нисэх боломжтой байгаа бөгөөд хэрэв уг хугацааг ихэсгэж багаар бодоход 30 минут болгож чадвал Хятад улс их хэмжээгээр худалдаж авах саналтай байгаа ажээ.
“SkyDive” төсөл нь анх 2012 онд “Cartivator” нэртэйгээр үүсгэн байгуулагдаж байсан бөгөөд гол ивээн тэтгэгчээр нь Япон улсын хамгийн том машин үйлдвэрлэгч компани болох Тоёота болон цахилгаан барааны тэргүүлэгч “Panasonic” болон видео тоглоом хөгжүүлэгч “Bandai Namco” зэрэг байсан юм.
Анх гурван жилийн өмнө туршилтын нислэг үйлдсэн ч тийм амжилттай болоогүй юм. Тиймээс дахин сайжруулалт хийсээр байгаа бөгөөд олон газруудаас санхүүгийн болон бусад тусламж аваад байгаа юм. Жишээлбэл Япон улсын хөгжлийн банкнаас энэ онд гэхэд л 40 сая ам.долларын хөрөнгө оруулалт өгөөд байгаа юм.
Эх сурвалж: APNews
