Ойрын таван жилийн хугацаанд хиймэл оюун ухаан хүн төрөлхтнийг эзлэх эрсдэлтэйг Элон Маск анхаарууллаа.

Энэхүү таамаглал нь хиймэл оюун ухаан хүний ​​оюун ухаанаас давж, бидэнд үл ойлгогдох хурдаар хөгжиж эхэлсэн цагт биднийг эзэлнэ гэсэн түүний өмнөх тооцоллыг үгүйсгэж байгаа юм. 

Ирээдүйн талаарх таамаг дэвшүүлэгч Рэй Курцвейл өмнө нь энэ супер хиймэл ухаан бий болох дээд цэгийг 2045 оны гэж тооцоолж байсан бөгөөд робот, компьютер, хиймэл оюун ухаан зэрэг технологийн үсрэнгүй хөгжил дэвшлийг үүнд нөлөөлнө гэж мэдэгдэж байв.

Цахилгаан автомашин үйлдвэрлэгч Тесла, сансрын SpaceX компаниудыг багтаасан Маск Нью Йорк Таймс сонинд өгсөн ярилцлагадаа хиймэл оюун ухаан 2025 он гэхэд хүнийг гүйцэж түрүүлэх боломжтой гэж үзэж байгаагаа хэлжээ.

Тэрбээр 2015 онд хиймэл оюун ухааны судалгааны лаборатор OpenAI байгуулахад туслалцаа үзүүлсэн бөгөөд сүүлийн жилүүдэд дэвшилтэт хиймэл оюун ухаан нь хүн төрөлхтнийг мөхөлд хүргэх аюул заналхийлж байгааг байнга анхааруулж байсан. Гэсэн хэдий ч тэрээр энэ асуудлыг зохих ёсоор ойлгоогүй хэвээр байгаа гэж бодож байгаагаа нэмж хэлэв.

“Яагаад хиймэл оюун ухааныг маш ухаалаг хүмүүс үл тоомсорлодог вэ гэвэл маш ухаалаг хүмүүс компьютер хэзээ ч тэдэн шиг ухаалаг байж чадахгүй гэж боддог. Энэ бол хий бардамнал бөгөөд илт худал ойлголт юм. Бид хиймэл оюун ухаан нь хүнээс хамаагүй илүү ухаалаг байх нөхцөл байдал руу чиглэж байна. Одоогоос таван жил хүрэхгүй хугацааны дараа бүх зүйл тодорхой болно. Гэхдээ энэ нь таван жилийн дараа бүх зүйл шууд там руу тониолно гэсэн үг биш. Харин нөхцөл байдал тогтворгүй түвшинд хүрнэ. ”гэж тэр хэллээ.

Элон Маск 2016 онд тархийг компьютертэй холбож чадах технологи хөгжөөгүй л бол хүн хиймэл оюун ухаанаар гэрийн тэжээвэр амьтад шиг хандах эрсдэлтэй гэж хэлсэн.

Энэ үгийг хэлсний дараахан ноён Маск "оёдлын машинтай төстэй төхөөрөмж" ашиглан тархины чип суулгахыг оролдож буй шинэ тархи-компьютерийн интерфейсийг хөгжүүлж эхлүүлэхээ зарласан билээ. 

Neuralink нь хүний оюун ухаан нь хиймэл оюунтай өрсөлдөх боломжийг олгоно гэж ноён Маск хэлээд тархины өвчнийг эмчлэх, сэтгэлийн хөдөлгөөнийг хянах, тэр ч байтугай хүмүүст "бидний чипнээс шууд хөгжим сонсох" боломжийг олгоно хэмээжээ. 

Маск, Курцвейл нар хоёулаа хиймэл оюун ухааны томоохон судлаачдын нэг бөгөөд хиймэл оюун ухааныг хөгжүүлэх хатуу удирдамжийг дэмжихээ амласан юм.

Амьдралын Ирээдүй Хүрээлэнгээс (FLI) 2017 онд нийтэлсэн нээлттэй захидалд хяналтгүй хиймэл оюун ухаан болоод зэвсэглэлийн хооронд салшгүй холбоо бий болохоос зайлсхийх шаардлагатай гэж үзсэн байдаг.  

Эх сурвалж: Independent