Японы софтболын тамирчин Мию Готогийн Токиогийн Олимпын наадмын шагналд авсан алтан медалийг нь сольж өгөхөөр болжээ. Японы Нагояа хотын дарга Такаши Кавамура Мию Готог хүлээн авч уулзах үеэрээ амны хаалтаа доошлуулан Олимпын алтан медалийг нь хазсан явдал цахим орчинд шуугиан тарьж, олны бухимдлыг төрүүлсэн юм.

Нагояа хотын даргыг халдвар хамгааллын дэглэмийг үл тоомсорлон, үл хүндэтгэсэн үйлдэл гаргасан хэмээн буруутгасан билээ. Тэрээр зохисгүй үйлдэл гаргасан явдалдаа уучлалт хүсч, шинэ медалийнх нь үнийг төлнө хэмээн амлажээ.

Такаши Кавамураг ийнхүү мэдэгдсэний дараа Токиогийн Олимпыг зохион байгуулагчид түүний хазсан алтан медалийг сольж, Мию Готод шинэ алтан медаль өгөхөөр болжээ.

Цахим орчинд иргэд Такаши Кавамурагийн үйлдэл нь бохир бүдүүлэг бөгөөд тамирчныг үл хүндэтгэсэн үйлдэл байсан гэж тодорхойлсон бол туялзуур сэлэмний төрөлд Олимпын мөнгөн медаль хүртсэн Японы тамирчин Юки Ота Олимпын наадмын үеэр хүртэл тамирчид халдвар хамгааллын дэглэм баримталж, өөрсдөө медалиа авч зүүж байсан гэдгийг онцолсон байна.

Мию Готогийн тоглодог клубын эзэн Тоёота компанийн зүгээс Нагояа хотын даргын үйлдлийг буруушаасан билээ. Нагояа хотын захиргаанд 72 настай Такаши Кавамурагийн үйлдлийг буруушаасан 7000 гаруй гомдол иржээ.

Мию Готогийн медалийг солихыг Олон Улсын Олимпын хороо болон Мию Гото нарын зөвшилцөл дээр тулгуурлан шийдвэрлэсэн ба зардлыг нь ОУОХ даах аж.

Олимпын медаль хүртсэн тамирчид медалиа хазаж гэрэл зургаа авахуулах явдал элбэг байдаг ба Мию Готод тохиолдсон явдлыг ОУОХ хөнгөнөөр хүлээж авчээ.

Өнгөрсөн долоо хоногт Токиогийн Олимпын наадмыг зохион байгуулагчид твиттер хуудаснаа, "Токио-2020 Олимпын наадмын медалийг идэж болохгүй гэдгийг албан ёсоор мэдэгдэж байна" хэмээн бичжээ.