КОНАКРИ. /BBC/. Баруун Африкийн Гвиней улсын армийн тусгай хүчнийхэн 83 настай Ерөнхийлөгч Альфа Кондег унагаж, Засгийн газраа тарааснаа ням гарагт зарлав.

Гвинейн Батлан ​​хамгаалах яам төрийн эргэлт хийх оролдлогыг зогсоосон гэж мэдэгдсэн боловч Ерөнхийлөгч өөрөө хараахан олон нийтийн өмнө гараагүй байгаа бөгөөд босогчид л телевизээр мэдэгдэл хийж байна.

Цэргийнхэн Ерөнхийлөгчийг тэдний гарт аюулгүй газар байгаа гэж мэдэгдсэн байна. Түүнчлэн Гвинейд хөл хорих цаг тогтоож, хилээ хааж, Засгийн газрын гишүүдэд даваа гарагт яаралтай хуралдаанд оролцохыг тушаажээ.

Нүдээр үзсэн хүмүүсийн мэдээллээс эш татан дэлхийн агентлагуудын уламжилж буйгаар, ням гарагт Гвиней улсын нийслэл Конакри хотод ерөнхийлөгчийн ордны орчимд ширүүн буудалцаан болж байгаа чимээ сонсогдсон байна. Дараа нь цэргийнхэн хойгт орших Калум дүүргийг хотын бусад хэсэгтэй холбосон цорын ганц гүүрийг хаажээ.

Ирж буй мэдээллээр, Конакри хотын төвийн оршин суугчдыг гэрээсээ гарахгүй байхыг тушаасан бөгөөд цэргүүд хоосон гудамжинд эргүүл хийсэн байна.

Ерөнхийлөгч Альфа Кондег албан тушаалаас нь огцруулан баривчилж, Засгийн газрыг тараасныг цэргийнхэн төрийн телевизээр зарлажээ.

Кондег унагасан тухай босогчдын удирдагч, дэд хурандаа Мамади Думбуя хэд хэдэн цэргээр хүрээлүүлэн телевизээр мэдэгдсэн байна.

Олон нийтийн сүлжээнд Альфа Конде товчгүй цамц өмссөн, хөл нүцгэн, бүрэн зэвсэглэсэн цэргүүдээр хүрээлүүлсэн дүрс бичлэг, гэрэл зургууд гарчээ. Эдгээр материал жинхэнэ эсэхийг хараахан батлаагүй байна.

Гвинейд болсон төрийн эргэлтийг НҮБ -ын Ерөнхий нарийн бичгийн дарга Антонио Гутерриш буруушаажээ. "Би Гвинейд болж буй үйл явдлыг биечлэн ажиглаж байна. Зэвсгийн хүчээр засгийн эрхийг булаан авч байгааг эрс буруушааж, Ерөнхийлөгч Альфа Кондег нэн даруй суллахыг уриалж байна" гэж Гутерриш твиттер хуудсандаа бичжээ.

Энэхүү эргэлтийг Африкийн холбоо /АХ/ ч мөн буруушаажээ. АХ-ны дарга, Бүгд Найрамдах Ардчилсан Конго Улсын Ерөнхийлөгч Феликс Чиседеки, АХ-ны комиссын дарга Муса Факи Махамат нар Ерөнхийлөгч Кондег нэн даруй суллахыг уриалж, тус холбооны Энх тайван, аюулгүй байдлын зөвлөлийг яаралтай хуралдуулахыг санал болгов. Холбооны гишүүд Гвинейн босогчдын эсрэг ямар арга хэмжээ авахаа шийдэх аж.

Өдгөө 83 настай Альфа Конде амьдралынхаа ихэнх хугацаанд сөрөг хүчний тэмцэгч байсан бөгөөд дэлхийн хамгийн ядуу буурай орны нэгд тооцогддог Баруун Африкийн энэ орны авторитар эрх баригчидтай тэмцэж иржээ.

Тэмцлийнхээ явцад тэрбээр 1990 -ээд онд ерөнхийлөгчийн сонгуульд оролцож, дараа нь шоронд хоригдож байсан боловч Ерөнхийлөгч Лансана Конте уучлал үзүүлсэн байна.

2010 онд Конте таалал төгсөж, цэргийн эргэлт гарсны дараа Конде ерөнхийлөгчийн сонгуулийн хоёр дахь шатанд ялж, Гвинейн ардчилсан замаар сонгогдсон анхны удирдагч болсон бөгөөд 2015 онд дахин төрийн тэргүүнээр сонгогджээ.

Гэвч Конде өөрөө авторитаризм руу халтиран орж эхэлсэн гэж өрсөлдөгчид нь мэдэгддэг аж. 

Д.Жаргал

Эх сурвалж: Монцамэ агентлаг