ERGELT.mn

Улс төрийн рейтингээрээ сүүлийн хэдэн сар Боловсрол шинжлэх ухааны сайд Л.Энх-Амгалан нэлээд дээгүүрт бичигдэх боллоо. Засгийн газрын давхар дээлтэй сайд нарын нэг болох түүнийг саяхныг хүртэл олон нийт “Хятадын эрлийз, Монгол Улсыг худалдсан “хужаа” гэхчлэнгээр нүд үзүүрлэж, түүнээс муу хүн энэ парламентад байхгүй мэтээр гадуурхаж байв. 

Гэтэл Л.Оюун-Эрдэнийн Засгийн газарт сайд болсноос нь хойш түүний нэр хүнд суга өсөж, төрд Л.Энх-Амгалангаас өөр ажлаа хийж байгаа сайн улстөрч гэж үгүй болов. Бизнесийн салбараас улс төрийн гараагаа эхлүүлж, сайн, муу нэр зүүсэн ч улс төрд чамгүй олон жил зүтгэж, УИХ-ын дэд дарга гэх хариуцлагатай албанд ч томилогдсон туршлагатай улстөрч гэгддэг. Боловсрол, шинжлэх ухааны сайдаар томилогдсон цагаасаа хойш Л.Энх-Амгалан олны анхаарлаас гарахгүй, явсаар өнөөдрийг хүргэлээ.

"Түүний гаргаж байгаа шийдвэр, хэлж байгаа үг нь улс төрд олон жил ажилласан туршлагатай улстөрчийн зангаргатай шийдвэр байна. Ойрын 10 гаруй жил энэ салбарт ийм боловсон хүчин үгүйлэгдэж байсан юм” гэх мэтээр иргэд алга ташин магтаж байгаа харагдана. Энэ итгэлийн Боловсролын сайд битгий алдаасай гэсэн хүлээлт ч олны дунд хэдийнээ бий болжээ.

Тэрбээр боловсролын салбарт сайдаар томилогдсон даруйдаа л хэд хэдэн ноцтой мэдэгдэл хийж, төрийн албанд бугшсан зарим хууль бус үйлдлийг илчлээд авсан удаатай. Тухайлбал, хамгийн анх сайдын суудлаа хүлээж аваад удаагүй байхдаа “Өндөр төлбөртэй хувийн өмчийн сургуулийн хувьсах зардлыг төрөөс олгодог байсныг зогсооно. Улаанбаатарт таван сая төгрөг хүртэлх төлбөртэй 106 сургууль, 5-10 сая төгрөгийн төлбөртэй 12 сургууль, 10-аас дээш сая төгрөгийн төлбөртэй найман хувийн сургууль байна. Би өндөр үнэтэй буюу 10 сая төгрөгөөс дээш төлбөртэй сургуульд хувьсах зардлыг өгч чадахгүй” хэмээн байр сууриа илэрхийлсэн. Мэдээж олон нийтийн дунд шүүмжлэл дагуулдаг ч салбараараа нуудаг байсан энэ сэдвийг сайд нь сөхсөн нь олны хараанд өртөж, чихийг нь сортолзуулсан нь тодорхой.

Үүний дараа “Газраа зарсан сургуулиудын захирлыг ажлаас нь хална” гэх мэдэгдэл хийснээр түүний нэр хүнд улам өсөх болсон. Тэрбээр “Төрийн өмчийн сургуулийн 104 тэрбум төгрөг арилжааны банкуудад байршуулсан байна. Байраа зарж, сургуулиараа бизнес хийхгүй шүү. Их, дээд сургууль бол арилжааны байгууллага биш. Та нар мөнгө хүүлдэг ломбард биш, мөнгө хүүлээд сууж болохгүй. Төрийн мөнгө төрийнхөө саванд байх ёстой. Эзэн нь юмаа мэдэж эрэг нь усаа хашина” хэмээн салбарынхандаа хатуухан сануулга өгөөд амжсан. Түүнчлэн “Боловсролын яам тендерийн яам биш шүү. 2021 онд манай яаманд дээр байгаа бүх хөрөнгө оруулалтын тендерийг Худалдан авах үйл ажиллагааны агентлагт 100 хувь шилжүүлж байна. Бид тендер зарлаад, тендерт цагаа зарцуулах шаардлага ерөөсөө байхгүй” хэмээн мэдэгдсэн нь боловсролын салбараа төдийгүй, бусад салбарын чиг үүргийг тодорхой болгох хатуухан анхааруулга болсон юм. 

Саяхан сургуулийн орчин дахь хүүхэд хамгааллын асуудлаар өөрийн байр сууриа илэрхийлж “Багшийн ёс зүйн асуудлыг авч хэлэлцдэг, хариуцлага тооцдог ил тод тогтолцоог бий болгоё. Сургуулийн байрын багш, анги даасан багш, захирал, нийгмийн ажилтнуудад хариуцлага, ёс зүйн шалгуур тавьж өгье. Энэ жилээс эхлүүлсэн сургуулийн сэтгэл зүйч бэлтгэх хөтөлбөрөө өргөжүүлж, сургууль бүрт сэтгэл зүйчтэй болгох ажлыг илүү хурдтай, эрчимжүүлэн ажиллах болно. Хүүхэд бүр эрүүл аюулгүй орчинд сурч боловсрох эрхтэй. Энэ эрхийг баталгаажуулах нь Монгол төрийн үүрэг. Гэм буруутай бүх хүн хариуцлага хүлээх ёстой” хэмээн мэдэгдсэн.

Хамгийн сүүлд тэрбээр  "Гоё дээлтэй хүүхэд шалгаруулж, өргөмжлөл өгөхөө зогсооё" гэх урилга гаргасан нь олны талархлыг мөн хүлээгээд амжсан. Тэрбээр "Дээлтэй Монгол нэрийн дор гоё торгон дээлтэй хүүхэд шалгаруулж өргөмжлөл өгөхөө зогсоо захирал, удирдлагуудаа. Хүүхдийг багаас нь дутуугийн зовлон эдлүүлэхээ больцгооё, одоо. Гоё дээлгүй байгаа нь хүүхдийн буруу биш" хэмээн бичсэн удаатай. 

Л.Энх-Амгалан өөрийнхөө эхлүүлсэн ажилд эзэн болох гэж салбарынхантайгаа “үзэлцдэг” гэх цуу яриа ч олны дунд бий. Тиймдээ ч өөрийн цахим хуудастаа “Ярьдаг биш хийдэг сайд байхыг л эрхэмлэнэ” хэмээн онцолсон байдаг.

Магадгүй түүний эхлүүлсэн энэ санаачилга, энэ шийдвэрүүд хүүхдийн эрхийг хамгаалах, хүүхдийн төлөө дуу хоолой болж чадаж байгаа нь олны хүндэтгэл хүлээсэн байж болох талтай. Энэ мэт шийдвэрүүд нь Л.Энх-Амгалан сайдын улс төрийн карьерыг суга өсгөж, төр түших боломжийг нь улам бүр нээж байх шиг. Л.Энх-амгалан сайдын эхлүүлсэн улс төрийн соёл улс төр дэх карьеараа өсгөх уриа лоозон битгий байгаасай.

Гол нь иргэдийн итгэлийг олсон шигээ эхлүүлсэн ажилдаа эзэн болж, ирээдүй хойч болсон хүүхэд, багачуудынхаа эрх ашгийн төлөө ажиллах нь юу юунаас илүү чухал байна, Л.Энх-Амгалан сайд аа.