Эрт цагт Египетэд баригдсан пирамидууд хамгийн гайхалтай түүхэн бүтээлүүдийн нэг билээ. Гайхамшигтай нууцууд агуулж буй энэ бүтээлийг хүн төрөлхтөн одоо ч бүрэн судалж, өгүүлэх түүхийг нь 100 хувь итгэлтэйгээр бичиж чадахгүй байна. Пирамидуудыг хэн барьсан, яах гэж барьсан, яаж барьсан гээд олон асуулт одоог хүртэл бүрхэг хэвээр. Эрдэмтэд, судлаачид хамтран олон таамаг дэвшүүлснээс үнэн байж болох гайхалтай таамгуудыг нь сорчлон хүргэе.

Пирамидыг атлантчууд барьсан

Эрт цагт Атлантын далайд “Атлантис” хэмээх арал дээр хүн төрөлхтнөөс ухаалаг, технологийн өндөр хөгжилтэй хүмүүс амьдарч байсан гэдэг. Атлантчууд хэмээх тэдгээр хүмүүс 4 метр гаруй өндөртэй хүмүүсийн төрөлх арал нь цунамид өртөж живэхэд амьд үлдсэн цөөн хэд нь эх газарт ирж өнөөгийн бидний мэдэх пирамид болон бусад гайхамшгийг бүтээсэн. Атлантисын тухай хамгийн анх эртний Грекийн суут сэтгэгч Платон өгүүлсэн байдаг. Өнөө үед далайн ёроолоос “Атлантис” хэмээх сүйрсэн хотыг олсон ч түүн дээр үнэхээр 4 метр гаруй өндөр, оюун ухаан төгс, технологийн өндөр хөгжилтэй хүмүүс амьдарч байсныг баталж чадаагүй. Гэхдээ зарим эрдэмтэн, судлаач Атлантисын “цагаачид” Египетэд ирж пирамидуудыг барьсан гэсэн онол дэвшүүлдэг. Тэдний энэ онолоор Атлантис арал дээр пирамид байсан бөгөөд атлантчууд соёлын зорилгоор шинэ газар /Египет/-таа пирамид барьжээ.     

Пирамид бол тахилын ширээ

Пирамидуудыг оршуулгын газар, бунхны зориулалтаар бус тахилын зориулалтаар барьсан гэсэн онол дэвшүүлдэг. Египетийн пирамидуудын хамгийн ууган нь болох Саккара /Saqqara/ одоог хүртэл гаднах шаталсан бүтцээ хадгалж байдаг бөгөөд шаталсан бүтцээр нь дамжин орой дээр нь гарч тэнгэр бурханд тахил өргөдөг байсан гэнэ. Саккараг Египетийн гурав дахь гүрэн /МЭӨ 2635-2611 он/-ий үеийн хоёр дахь фараон Жосер /гэгээнтэн гэсэн утгатай/ тушаал өгч МЭӨ 2650 оны үед бариулж байжээ. Пирамидыг эртний Египетийн канцлер, уран барилгач, дээд санваартан Имотеп барьсан бөгөөд фараон өөрийгөө нас барсны дараа тэнгэрт хүргэхийн тулд үүнийг бариулжээ. Ямартай ч, тухайн үед Египетэд Имотеп гэж олон талын авьяастай, маш ухаалаг хүн байсан нь тогтоогдсон.  

 

Одон орны ажиглалтын төв

Пирамидуудын талаарх хамгийн нийтлэг нь одон орны ажиглалтын төв гэх онол юм. Пирамидуудын оройгоос ойр тойрны бүх зүйлийг ажиглаж болох бөгөөд пирамид хоорондын зай 365 алхам буюу жилийн хоногийн тоотой адилхан байдаг.    

 

Жолоодлогын станц

Гизагийн аугаа пирамид хэмээх Египетийн хамгийн том пирамидын талаар Францын эрдэмтэд нэгэн онол дэвшүүлсэн нь жолоодлогын станц хэмээх анхаарал татам нэр юм. Тэд тус пирамидыг “эртний GPS” буюу байршил тодорхойлогч хэмээгээд хөлөг онгоцууд Гизагаас өгсөн “дохио”-г хүлээн авч эх орондоо ирдэг байсан гэв. Гэхдээ ингэж эртний далайчдад тусалдаг байсан эсэх нь тодорхойгүй юм.

 

Пирамидууд үр тарианы агуулах байсан

Энэ таамгийг дундад зууны үеийн Бродер Бернард хэмээх хувраг дэвшүүлжээ. Тэр Египетээр аялж байхдаа пирамидуудыг үр тариа хадгалах зориулалтаар анх баригдсан гэж үзжээ. Ямартай ч, “Book of Genesis” хэмээх нэлээд алдартай эртний номонд зөнч Египетэд их өлсгөлөн болохыг урьдчилан харж хэлснээр фараон үр тариа болон хүнс хадгалах цамхгууд барихыг үүрэгдсэн тухай гардаг. Магадгүй энэ цамхгууд нь пирамид байж болох юм.  

Эрчим хүчний төв

Эртний египетчүүд нэлээд дэвшилтэд технологитой байсан гэдэг. Түүгээр ч зогсохгүй сансар огторгуйн эрчим хүчийг хэрхэн цуглуулахаа мэддэг байсан гэнэ. Энэ зорилгод пирамидууд үйлчилдэг байсан аж. Сансрын эрчим хүч юунд хэрэгтэй байсан гэж үү. Фараонуудад хэрэгтэй байсан. Тэд мөнх амьдрахын тулд пирамидуудыг бүтээж, түүнийгээ сансрын эрчим хүчээр цэнэглэдэг байсан гэнэ.  

 

Харийнханд зориулагдсан гэрэлт цамхаг

Далайн эрэгт орших гэрэлт цамхаг далайчдыг зүг чигээ олоход тусалдаг. Түүнтэй адилаар пирамид нь харийнхныг зүг чигээ олоход тусалдаг байжээ. Энэ онолоор бол харийн хөлөг газардахдаа пирамидаар баримжаагаа авдаг гэх мэдээлэл бий. Энэ  таамаглал нь пирамидуудыг хүн биш харийнхан барьсан гэх нь бий.

 

“Мэдээллийн агуулах”

Британийн математикч Жон Легон тэргүүтэй хэсэг эрдэмтэн пирамидуудыг мэдээллийн бааз болгон барьсан гэсэн онол дэвшүүлжээ. Тухайн үед египетчүүд нэлээн хөгжиж, хойч үедээ өөрсдийнхөө талаар их хэмжээний мэдээлэл үлдээхээр болж, түүнийгээ хэзээ ч устаж үгүй болохгүй зүйл дотор хадгалсан нь пирамид гэнэ. Пирамид дотор маш их мэдээлэл зурсан байдаг бөгөөд Жон Легон    пирамидын суурийн харьцаа пирамидын өндөртэй яг адилхан байгаа нь энэ бүтээлийг “агуулах” гэдгийг илтгэж байна гэсэн юм. Түүнийхээр эртний Египетийн соёл иргэншил мөхсөн ч үлдэж хоцорсон энэ гайхамшигт бүтээлүүд, түүний дотор дүрслэгдсэн мэдээллүүд эртний египетчүүдийн талаарх мэдээллийн маш том бааз болж байна.