Ипотекийн зээл зогсоогүй, банкууд зарим барилгын компаниудыг дэмжиж ажиллаж буйгаас энэ ажил удааширч байна
Ипотекийн зээл зогссон эсэх талаар иргэдийн дунд эргэлзээ бий. Тэгвэл салбарын удирдлага энэ талаар хэвлэлд ярилцлага өгөхдөө “Ипотекийн зээл тогтмол гарч байгаа. Монголбанкны эргэн төлөлтөөр 220 тэрбум, улсын төсвийн 120 тэрбум, нийт 340 тэрбум төгрөгийн санхүүжилтээр энэ жил ипотекийн зээл олгож байна. Санхүүжилтийг сар бүр хийж буй. Улсын төсвийн 120 тэрбумыг дөрвөн улирал дараалан олгоно. Гуравдугаар сард 30 тэрбум төгрөг олгосон. Монголбанкны эргэн төлөлтийн санхүүжилт бол сар бүр хийгдэж байгаа” хэмээн ярьсан байна.
Харин ипотекийн зээлийн санхүүжилт хэвийн явагдаж байгаа, энэ ажил зогсонги байдалд ороогүй гэж хэлж буй хэдий ч банкууд иргэдийн материалыг аваад зээл өгөхгүй байгаад асуудлын гол нь байгаа аж. Энэ нь арилжааны банкууд зээл олгохдоо тухайн банкнаас зээл авч үйл ажиллагаа явуулж байгаа буюу хамтран ажиллаж байгаа компанийнхаа барьсан барилгаас борлуулахаар иргэдэд санал тавьж байгаатай холбоотой аж. Гэхдээ л ерөнхий дүнгээр нь авч үзвэл ипотекийн зээлийн хүрэлцээ маш бага байгаа гэдгийг албаны хүн хэллээ. Тиймээс ипотекийн зээлийн санхүүжилтийг нэмэх асуудал ярьж байгаа гэнэ.
“2019 оны төсвийн төслийг хэлэлцэхэд энэ асуудлыг нэлээд ярьсан. Үүнээс гадна түрээсийн орон сууцны хөтөлбөрийг хэрэгжүүлж иргэдийг орон сууцжуулъя гэж байгаа. “Буянт-Ухаа-2” хороололд 972 айлын орон сууцыг түрээсийн журмаар ашиглалтад оруулна. Түрээсийн орон сууцын хүрэлцээг нэмэгдүүлэхийн тулд гаднын зарим улс оронд санал тавьж байна. Тухайлбал, Кувейтийн Элчин сайдтай уулзаж 4300 айлын түрээсийн орон сууцны төслийг дэмжиж өгөөч гэсэн санал тавьсан. Мөн Өмнөд Солонгосоос авах 500 сая ам.долларын хөрөнгийг Улаанбаатар хотын утааг бууруулах чиглэлд зарцуулна. Тэр дундаа орон сууцжуулах үйл ажиллагаанд зарцуулах төлөвлөгөөтэй байгаа” гэж БХБ-ын сайд Х.Баделхан хэллээ.