Үндэсний сэтгүүл зүйн 105 жил, дэлхийн хэвлэлийн эрх чөлөөний өдрийг тохиолдуулан Монголын сэтгүүлчдийн нэгдсэн эвлэл, нийслэлийн ЗДТГ-ын дэмжлэгтэйгээр “Хараат бус сэтгүүл зүй” үндэсний форумыг өнөөдөр “Соёлын төв өргөө”-нд зохион байгууллаа. Энэ форумд салбарын удирдлагууд, хэвлэл мэдээллийн байгууллагын төлөөлөл, ахмад, дунд залуу үеийнхэн цуглаж, сэтгүүл зүйн салбарт тулгамдсан асуудал, цаашид хэрхэн ажиллахаа ярилцсан юм. Энэ арга хэмжээнд хотын мээр С.Батболд хүрэлцэн ирж үг хэлсэн бөгөөд сэтгүүл зүйн салбарынханд баяр хүргэж Сэтгүүлчдийн ордон барих газрын асуудлыг шийдвэрлэснээ дуулгасан юм. Тэрээр “Монголын сэтгүүлчдийн нэгдсэн эвлэлийн зүгээс “Сэтгүүлч ордон" барих газар олгож өгөхийг хотын удирдлагаас хүссэн. Тус ордон барих газрын асуудлыг шийдвэрлэсэн тул энэ хавартаа бүтээн байгуулалтаа эхлүүлж, ирэх жил гэхэд Улаанбаатар хотод сэтгүүлчээр овоглосон сайхан ордон сүндэрлэнэ гэдэгт итгэлтэй байна” хэмээсэн юм. Түүнчлэн “Дэлхийн хэвлэлийн эрх чөлөөний өдөр”-ийг тохиолдуулан Үндэсний сэтгүүл зүйн хөгжилд үнэтэй хувь нэмэр оруулж байгаа зарим хэвлэл мэдээллийн байгууллагуудад Нийслэлийн Засаг даргын өргөмжлөл гардуулсан байна.
